LUWEERO: Abooluganda 2 bafiiridde mu kinnya ekitali kibikkeko

ENTIISA ebuutikidde abatuuze ku kyalo Kanyanda ekisangibwa mu ggombolola y'e Makulubita mu disitulikiti y'e Luwero abooluganda babiri bwe bagudde mu kinnya kya ttooyi ekyali kyasimwa emyaka mukaaga  ne bafiiramu.

Omu okufa abadde agenze kugezaako kuggyayo muganda we oluvannyuma lwa poliisi okulwawo okutuuka baggyeyo omulambo.

Abafudde kuliko; Jothan Ssempijja 47 ne Magret Nakimewa 40 nga bano babadde batuuze ku Kanyanda.

Nakimera okutuuka okugwa mu kinnya kino kyaddilidde okugenda okutyaba enku kyokka n'atakomawo waka nga kino kyawalilizza abatuuze okugenda mu kakiiko ke kyalo nabo abasitukiddemu ne batandika omuyiggo.

Bano baalingizza mu kinnya kino era bwe batyo ne balengerayo omuntu wansi ne bakizuula nga ye Nakimera kwe kuyita poliisi.

Poliisi mu kulwawo okutuuka kyawalirizza Ssempijja okukka mu kinnya aggyeyo muganda we kyokka bwe yatuuse wansi bw'atyo n'alemererwa okukkakkana nga naye afiiriddemu.

Waavuddeyo omutuuze omulala Yelule Kayikuzi naye n'agezaako okukka wansi aggyewo Ssempijja naye n'alemererwa olw’omukka okumubula wansi.

Kansala w'abavubuuka Prossy Nakanjako atulambuzza ekifo kino n'agamba nti obulagajjavu bwonna bwavudde ku nnannyini kifo kino eyasima  ekinnya kyokka n'assaako akaveera mu kifo ky'okutundirirako embaawo.

Nakanjako asabye poliisi ekwate bannannyini kifo bavunaanibwa mu mateeka olw’obulagajjavu.

Oluvanyuma poliisi eggyeeyo emirambo gy'abooluganda ne gitwalibwa mu ggwanika ly'eddwaliro e Mulago.

Omwogezi wa poliisi mu bitundu bya Savanan, Sam Twineamazima agambye nti bagguddewo omusango ogw’obulagajjavu eri bannannyini kifo kino era poliisi yabakanye dda n'okubanoonya babitebye.