Nassanga yeetisse engule ya 'Forte bet Real Stars'

OMUZANNYI wa She Cranes ttiimu y’eggwanga ey’okubaka Shadia Nassanga Sseggujja awangudde engule y’omubasi asinze okwolesa omutindo omwezi oguwedde (December) eya ‘Forte bet Real Stars Netball Player of the Month’.

Nassanga okuwangula kiddiridde okwefuga empaka z’ekikopo kya Africa (Africa Netball Cup) ezaazanyiddwa okuva December 9 ne zikomekkerezebwa December 14 mu kibuga Lilongwe ekya Malawi.

Ekifudde Nassanga ow’enjawulo kyaddiridde, sitta wa She Cranes Mary Nuba Chelohko azannya pulo mu Queensland Firebirds mu liigi ya Australia (Suncorp Super Netball league) okulemererwa okukiika mu mpaka zino. Kino kyawadde Nassanga omukisa okwefuga olugoba lw’abateebi era yazannyi ensiike zonna.

Omutindo Nassanga gwe yayolesezza okuteeba buli mupiira ogwatuuse mu ngalo ze, gwayambye Uganda okuwangula ffeeza mu mpaka zino bwe yakubiddwa South Africa (56–34) ku fayinolo.

Mu ngeri y’emu Nassanga yayambye ttiimu ya KCCA Netball club okweggyako ekikwa kya myaka egisukka mu 46 nga tebawangula kikopo kya liigi y’eggwanga ey’oku ntikko (Uganda Netball Super League) bukya batandika kugyetabamu myaka gye '1970s'.

Wiiki bbiri eziyise  KCCA baakakasiddwa nga bakyampiyoni ba liigi sizoni eno n’omugatte gwa bubonero 45 oluvannyuma lw’okumegga Prisons Netball Club ku bugoba (44-41) mu nsiike eyabadde esalawo era eyaggaddewo kalenda y’omwaka guno.

KCCA yeefuga omuzannyo okuva ku ntandikwa bwe yawangudde ‘quarter’ esooka n’obugoba (12-11), ekitundu ekisooka kyaweddeko nga balina obugoba (24-20), ne baweza (34-31) mu ‘quarter’ eyookusatu okutuuka ku ffirimbi esemba.

Baabadde ku kisaawe kya HAMZ stadium, Nakivubo war memorial mu kibuga Kampala.

KCCA baddiriddwa National Insurance Corporation (NIC) netball club n’obubonero 44, Prisons netball club (38), UCU netball club (37) n’endala ne zigoberera.

“Neebaza Katonda olw’okunfuggyako eddusu, nannondayo mu bangi okufuuka omuzannyi wa December, era njagala okwebaza bazannyi bannange kuba kino mbadde sisobola kituukako nzekka, wabula obuwanguzi bwa ffenna ate n’abatendesi wamu n’ekitongole kya KCCA,” Nassanga bwe yategeezezza.

Abalala abaawangudde engule ez'enjawulo ye; Sana Omprakash (chess), John Oduke (Life Achievers Award).