Fauzia Najjemba yeegasse ku Boston Legacy WFC eya Amerika

EYALIKO kapiteeni wa Crested Cranes, ttiimu y’eggwanga ey’omupiira gw’abakazi Fauzia Najjemba akutudde ddiiru ensava bwe yeegasse ku Boston Legacy WFC ezannyira mu liigi y’oku ntikko mu America (American National Women's Soccer League (NWSL).

Najjemba 22, okwegatta ku Boston Legacy WFC kiddiridde obutazza buggya ndagaano gy’abadde nayo mu Dynamo Moscow eya Russia eyabadde eweddeko. Ono yataddeko omukono ku ndagaano ya myaka ebiri wabula mulimu akawaayiro k’okugizza obuggya.

Kati afuuse munnayuganda owookubiri okwesogga liigi y’omupiira gw’abakazi mu America oluvannyuma lw’omuzibizi Shadia Nankya, omwaka oguwedde eyeegasse ku Washington Spirit, wabula basoose kumwazika Dallas Trinity FC mu United Super League (USL).

"Ndi musanyufu okwegatta ku Boston Legacy, mukisa gwamaanyi nnyo era neesunga olunaku lwe ng’enda okutandika okubazannyira nga liigi eggyiddwaako akawuuwo,” Najjemba bwe yategeezezza.

Najjemba eyatandikira omupiira ku ssomero lya Mukono High School, yeegatta ku Isra Soccer Academy gye yava okwesogga Kampala Queens FC mu Uganda. Oluvannyuma yagenda ku pulo mu BIIK Kazygurt eya Kazakhstan gye yava okwegatta ku Dynamo Moscow.

Eno ye sizoni ya Boston Legacy WFC okuzannya mu liigi y’oku ntikko mu America okuva 2023 lwe yatandikawo.

Najjemba ye yawangula kapyata w’emmotoka ey’omuzannyi eyasinga okuzannya omupiira mu 2021 (Airtel FUFA female player of the year).