Uganda ewangulidde waggulu laawundi esooka ey'eza FIM Africa Central Motocross Championship

UGANDA eyongedde okwefuga empaka z’amasekkati n’obuvanjuba (FIM Africa Central Motocross Championship) bwe bawangudde laawundi esooka eyakomekkerezeddwa eggulo ku kisaawe kya Victoria Raceway park e Garuga.

Abamu ku bavuzi ba ddigi abeetabye mu mpaka

Uganda yawangudde emitendera gyonna 9 egyavugiddwa n’ekung’aanya omugatte gwa bubonero 2,419 ate Kenya yamalidde mu kyakubiri n’obubonero 138 bwokka.

Mu mitendera 9 Uganda yakukumbye obubonero 327 okuva mu mu mutendera gwa 50cc Senior, 345 okuva mu 65cc, 263 okuva mu 85cc, 285 okuva mu 125cc, 276 okuva mu MX2, 257 okuva mu MX1, 217 okuva mu MX Veterans, 267 okuva mu MX Women Open ne 182 okuva mu MX Women Lites.

Rwanda ne Tanzania zaabadde zeewandiisizza okwetaba mu mpaka zino wabula zaalemereddwa ku ssaawa esembayo.

Okuvuganya kwabadde wakati wa Uganda ne Kenya kyokka Kenya yaleese abavuzi 4 bokka okubbinkana ne bannayuganda 82.

Abawagizi baabugaanye essanyu olw’okudda kw’eyaliko kapiteeni wa ttiimu y’eggwanga, Maxime Van Pee wamu ne mukwanogwabangi Fortune Ssentamu.

Ssentamu yawangudde omutendera gwa MX1 n’addirirwa Van Pee. Uganda yaakawangula engule eno sizoni 9 ez’omuddiring’anwa, kati balinze laawundi esembayo era esalawo omuwanguzi w’engule y’omwaka guno eneevugirwa e Nairobi – Kenya mu December.