Mmengo etangaazizza ku Kabaka okukwata ekisumuluzo

Omukolo guno gutegekebwa buli mwaka okumala kati emyaka mukaaga.

Ssaabasajja bw’aba ayingiza abantu be mu mwaka akozesa ekisumuluzo ekiwundiddwa  mu kikomo. Kano ke kabonero akatutwala mu mwaka omuggya.

 Ekisumuluzo kiko-zesebwa okulaga nti waliwo olugendo olupya olubagiddwako.

Y’ensonga    lwaki  Pulezidenti Yoweri Museveni abadde akwasibwa ekisumuluzo buli mulundi lw’abadde alayizibwa, ng’awangudde obululu mu l996, 2001 ne 2006.

  Ne bannaddiini bwe baba baggulawo amasinzizo batera okweyambisa akabonero k’ekisumuluzo.

Ekisumuluzo  Sssa-basajja ky’akozesa tekirina ngeri  yonna gye kyekuusa ku byabufuzi, ng’abamu bwe babadde batandise okubyogera.
 Ssaabasajja Kabaka ne gavumenti ye, ey’e Mmengo tebalina ludda mu byabufuzi.

  Buganda enyweredde ku biruubirirwa byayo  ebyafunzibwa mu nsonga ssemasonga ettaano: Obwakabaka nekitikkiro kyabwo, nga ye Ssaabasajja Kabaka; okugabana obuyinza mu nkola eya federo; okukuuma ettaka n’ensalo za Buganda; okulwanyisa obwavu ng’abantu bayambibwa mu ngeri ennung’amu ;  n’okukuuma obumu bw’abantu ba Buganda.

Munnabyabufuzi  awagira ebyo Mmengo emusanyukira awatali kusosola mu bibiina byabufuzi.
Charles Peter Mayiga ye Minisita wa Buganda avunaanyizibwa ku By’amawulire n’ensonga za Kabineti.