Omushaija aistirwe ahabwa shiringi 1000 - Agago.

N'ebya Simon Masaba.   AGAGO.    

Omushaija w'emyaka 52 omu gomborora eya Lapono omu disiturikiti eya Agago aitsirwe ahabwa shiringi 1,000.   

Oitsirwe amanyirwe nka Tarasisto Okwera omuhingi kandi omutuura w'omukyaro ekya Nyer Ikan South. Okello Aldo Akech, 32, kuruga omu kyaro ekya Ocoyo Lamero akwatsirwe Pooriisi ahabw'okugambwa kuba acumitsire Okwera akamwita. 

Eki nikigambwa kuba kibaireho omu eihangwe ry'ebiro 23/10/2023 shaaha nka 8:30 z'ekiro okurugiirira ahari Fred Enanga, Omugambirizi wa Pooriisi.      

Enanga okugamba ebi n'obu yaaba nagambaho omu rukiiko rw'ebitongore by'okwerinda n'abanyamakuru aha kitebe kikuru kya Pooriisi omuri Naguru, Kampala. Nikigambwa ngu ebi byona biizireho bwanyima ya nyakuteekateekwaho kugambira omugyenzi ngu amukanikire engufuru ye kumushashura shiringi 2,000 .   

Beitu hoona, obutaikirizana bwizireho bwanyima ya Okwera kumushashuraho shiringi 1,000 atyo akaraganisa kwija kumuheereza shiringi 1,000 ezindi bwanyima.   

"Beitu nyakuteekatekwaho ashabire Okwera kumushashura esente ze zoona ekireeteire baatandika kutambikirana ebigambo," Enanga arikushoborora.    

Nayongyeraho ngu embeera eizire kutabuka bwanyima ya nyakuteekateekwaho kukwata omusyo kifuba akatandika kwiruka ahari Okwera ahi ahendereire amucumitsire omu mbaju.    Enanga naagira ngu abatuura beekoziremu omurimo nikwo kukwata nyakuteekatekwaho bakamukwatsa ceeyamaani w'ekyaro.  Okwera afiire  ahabw'obuhuta obu atungire kandi abaire ariyo natwarwa omu eirwariro erya Kalongo.

Abatuura ababaire baine ekiniga nk'eky’enjoki z'ekyanda bagyerizeho kwenda kutwarira amateeka omu ngaro, kwenda kutaahirira nyakuteekatekwaho beitu Pooriisi kuruga ahari Lapono Police Post ebaremeise nikwo kwija ekatwara nyakuteekatekwaho.  Aha bujurizi obwaherize kurundaanwa, ni omusyo ogushangirwe aha mwanya ogu omugyenzi aiteirweho kandi nigugambwa kuba nigwo gukoresiibwe omu kwita Okwera.

#WestUpdates