Abashomesa omu matendekyero g’eby’emikono besharingire ahabw'omushaara- Ntungamo.

N’ebya Bruno Mugizi 

NTUNGAMO

Abashomero b’amatendekyero g’eby’emikono erya Ihunga polytechnic Institute hamwe na Kibatsi Technical Institute omu disiturikiti ya Ntungamo nyomwebazyo ebiro 05/02/2024 besharingire ahabw’okukyererwa kutunga omushaara gwabo.

Aharw’okubanza ebiro 05/02/2024 nibwo amashomero gaigwireho omu butongore ahabwa taamu y’okubanza omu eihanga ryoona.

Abashomesa barahiire obutagaruka mu bibiina kushomesa kuhisya obu baratungye omushaara gwabo kuruga okwezi kwa 10 omwaka oguhwaire.

Obwo bakwise ebipande bihandiikireho ebigambo nka; No attending classes without salaries, We want our salary, We are tired of discrimination, abesharingi bataahiriire ofiisi ya Diisi kandi barahiire obutagaruka kushomesa okuhisya obu barashashurwe.

Amatendekyero aga 2 gaine abashomesa barikurenga omuri 50 hamwe n’abakozi abatari bashomesa beitu tibakatungire nushu yoona kuruga okwezi kwa 10.

Onesmus Ndyaguma, omushomesa ahari Kibatsi Technical Institute Kajara oyebembiire okwesharinga oku agizire ngu nikimaramu amaani kushanga ngu n’obu bahaireyo okwetomboita kwabo aha kukyererwa kushashurwa, abakuru abarikukwatwaho bakanga kukora ahanshonga zaabo.

Atuhaire Ketty Hamidah, omushomesa ahari Ihunga Polytechnic Institute, naagira ngu okukyererwa kutunga omushaara kuteeganiise obwegyese bw’abaana baabo kandi obwo baine abaana abandi abu barikushomesa.

Abeesharingi ku bagyerizeho kutaaha omu ofiisi ya Diisi wa Ntungamo, Mathias Ndifuna, 'office messager' ou amaziina ge gatagambirwe agyemesereziibwe kukinga ofiisi nikwo kuzibira abeesharingi ababaire baine ekiniga kyingi kutaaha omu ofiisi.

Beitu hoona, Muhairwe Jenipher, orikukurira enshonga z’abakozi omu disiturikiti eya Ntungamo ashabire okusaasirwa ahabw’okukyererwa kw’omushaara beitu agizire ngu eki kiretsirwe okwongyera omushaara abashomesa ba sayaansi omu matendekyero g’eby’emikono omu disiturikiti.

"Omushaara gwabashomesa ba sayaansi gukongyerwaho beitu tigukateirwe omu mbaririra yeitu ya disiturikiti ey’omwaka gwa 2023-2024. Tushabire embaririra y’enyongyeserereza kuruga omu minisiture y’eby’esente kandi esente ku ziraarebukye abakozi boona ab’omu matendekyero g’eby’emikono nibeija kushashurwa,” Muhairwe arikushoborora.

Ebyo bikiri aho, Rosemary Atuhaire, Omuhwezi wa RDC wa Ntungamo ashabire abashomesa okugaruka aha matendekyero gaabo bakashomesa obwo gavumenti erikukora ahanshonga y’omushaara gwabo.

"Nitwenda kubahamiza ngu nitwija kugyezaho kureeba ngu mwatunga omushaara gwanyu ogw’okwezi kw’okubanza n’okwa kabiri obwo turikukuratiriza omushaara gw’ameezi 4 ogumurikubanja. Ninyenda kubahamiza ngu aha muheeru gw’okwezi oku, ekizibu kyanyu nikiija kukorwaho,” Rosemary arikushoborora.

#WestUpdates