Abashuubuzi baikirize okwiguraho bizinesi zaabo bwanyima y’okubuganaho Purezidenti Museveni

N’ebya Omushaki Waitu

Kampala:

Purezidenti Yoweri Kaguta Museveni eizooba erya nyomwabazyo abugaineho kandi yaagaanira n’abeebembezi b’abashuubuzi omuri Kampala n’ebyanga ebindi omumaka gye g’obwa Purezidenti omuri Entebbe.

Orukiiko oru rwizireho bwanyima y’akeesharingo k’abashuubuzi abakiingire amaduuka gaabo na za bizinesi obwo barikwetomboitira emishoro ya URA hamwe n’enkora ey’okushashuriramu emishoro eya EFRIS.

Orukiikooru rubaire rukwatiraine n’ahamishoro etairwe aha bizinesi namunonga enkora eya EFRIS.

Omu rukiiko oru, Purezidenti amanyise abeebembezi b’abashuubuzi ngu naija kubuganaho abakuru kuruga omu Minisiture y’eby’esente na URA ahabiro 24/4/2024 kugaanira ahanshonga egi.

Hoona Purezidenti agarukire yaagira ngu naija kubuganaho abashuubuzi boona ahabiro 7/5/2024 ahakishaayi ekya Kololo Grounds.

Hoona Purezidenti araagire URA kuba eyemereize enkora ya EFRIS n’abatangisiibwe ahabw’obutashashura emishoro kubaasa kubahwera okucondooza.

Abeebembezi b’abashuubuzi beikirize okugarukamu kwiguraho bizinesi zaabo obwo barikugumizamu nibeebuza ahari Gavumenti.

Tiimu y’abantu 61 ebaire eyebembeirwe Kabanda John, orikwebembera ekigombe ky’abashuubuzi ekya FUTA, Dr. Musoke Thadeus Agenda, orikwebembera ekigombe ky’abashuubuzi omuri Kampala ekya KACITA n’omugambirizi w’ekigombe ekya KACITA, Issa Ssekito.

#WestUpdates