Bana bakwateirwe okunaga obubi bw’abantu omu mufuregye.

N’ebya Simon Peter Tumwine

NANSANA

Abakazi 2 n’abaana 2 batakahikize myaka 18 bakwatsirwe ekitongore ky’eby’obuhangwa ekya National Environmental Management Authority (NEMA) ahabw’okugambwa kuba bashukire obubi bw’abantu omu mufuregye gw’amaizi omuri Nansana.

Mariam Ndagire, 36, Moreen Nakavubu, 28, hamwe n’abandi babiri obu amaziina gaabo gatagambwa bakwatsirwe Orwakashatu ebiro 08/05/2024 bwanyima y’akatambi ka vidiyo kujanjaara aha mikura ya kanyabwengye karikworeka abantu aba barikunaga obubi bw’abantu omu mufuregye gw’amaizi ahabiro 04/05/2024.

Arikugambaho n’abanyamakuru aha ofiisi z’ekitongore kya NEMA bwanyima y’okukwata abantu aba, Naomi Karekaho- orikukurira eby’empurizana omu NEMA nakyoreka ngu bwanyima y’okureeba aka vidiyo aka, Pooriisi y’ekitongore kya NEMA ebitaahiremu yakwata yabakwata.

Nakyoreka ngu abantu aba bakwateirwe omu kyaro ekya Nsumbi Zone omuri Nansana Munisiparite omu disiturikiti eya Wakiso.

Karekaho naagira ngu ekitongore kya NEMA nikijunanizibwa aha kureeba ngu omwanya ogu abantu barikuturamu n’omuyonjo.

Nakyoreka ngu ekitongore kizire nikyejumbira omu kukwata abantu abarikutaahirira eby’obuhangwa beitu abantu bagumizemu n’okutaahirira eby’obuhangwa.

Karekaho nayongyera ashaba gavumenti okwongyera ekitongore eki esente kibaase kukora gye omurimo gwakyo ogw’okurinda eby’obuhangwa.

Omoro nakyoreka ngu buri nyakuteekateekwaho naija kucwerwa omutango gwa shiringi miriyooni 11 arikwongyeraho babihireho siteetimenti kandi nibeija kutwarwa omu kooti ya Buganda Road ahi omushango gwabo gurikuza kuhurirwa.

Omu kugambaho na Ndagire na Nakavubu, bashabire okusaasirwa barikwongyeraho okunaga obubi bw'abantu omu mufuregye babaire batarikukimanya ngu nibahenda ekiragiro.

#WestUpdates