Okugaba ebikwato by’okukyebera HIV nikutongozibwaho eriizooba.

N’ebya Apollo Mubiru

KOLOLO

Purezidenti Yoweri Museveni nateekateekwa kukurira omukoro gw’okutongozaho okugaba ebikwato by’okwekyebera akakooko ka siriimu omuri za disiturikiti 146. Omukoro ogu guri aha kishaayi kya Kololo omuri Kampala eriizooba Orwakana.

Minisiture y’eby’amagara egyenderiire kuhisya obuheereza bw’okukyebera haihi n’abantu n’okukyendeza aha abantu abarikutina kuza kwekyebeza.

Dr. Robert Mutumba, omuhwezi wa kamishana w’eby’okurwanisa endwara y’akakooko ka siriimu agambiire abanyamakuru ngu n’obu Uganda ekozire kihango omu kurwanisa akakooko ka siriimu, abantu abasya abarikukwatwa akakooko ka siriimu nibakyeyongyera omu eihanga.

Okucondooza nikworeka ngu ebicweka 11 ahari 100 bw’abantu abarikutuura n’akakooko ka siriimu omu Uganda bakaba batarikukimanya ngu baine akakooko.

Okujanjaara kw’akakooko ka siriimu omu bantu abari ahagati y’emyaka 15-24 omu Uganda kwemeriire aha bucweka 6.2 ahari 100, okujanjaara kw’akakooko omu bakazi kuri aha bucweka 7.6 ahari 100 kandi omu bashaija ni obucweka 4.7 ahari 100.

Eki nikimanyisa ngu abantu barikuhika miriyooni emwe n’emitwaro 20 abari ahagati y’emyaka 15-64 nibo barikutuura n’akakooko ka siriimu omu Uganda.

#WestUpdates