Ow’emyaka 27 aitsire ishe ahabw’omwani omuri Sheema.

N’ebya Bruno Mugizi

SHEEMA

Pooriisi omu disiturikiti ya Sheema eriyo nehiiga omushaija w’emyaka 28 ahabw’okugambwa kuba aitsire ishe w’emyaka 70.

Martial Tumusiime, Omugambirizi wa Pooriisi ahabw’ekyanga ekya Bushenyi empango naagamba omugyenzi nka; Tiburisiyo Bitwire, 70, omutuura wa Kyabahaija 11, omuri Kyangundu woodi omu tauni kanso ya Kakindo omu disiturikiti eya Sheema.

Tiburisiyo Bitwire, 70, oitsirwe omutabani ahabw'omwani omu tauni kanso ya Kakindo omu disiturikiti eya Sheema aharwakabiri ebiro 07/05/2024.

Nayongyeraho agamba nyakuteekateekwaho nka; Bitwire Julius, 28, omuvugi wa boda-boda kandi omutuura w’omu kyaro nikyo kimwe.

Nikigambwa ngu aharw’okubanza ebiro 06/05/2024, nyakuteekateekwaho aibire omwani gw’ishe kimuzaara (omugyenzi) aizire akamuhababira aha Pooriisi ya kakindo.

Eizooba erindi erikuratsireho ery’ebiro 07/05/2024, aba Pooriisi kuruga aha Pooriisi ya Kakindo bagyenzire bakwata Bitwire Julius (orikuteekateekwaho) beitu eky’obusaasi ayirukire yayeshereka.

Nyakuteekateekwaho agarukire omuka shaaha nka 2:50 z’ekiro nikwo kushanga ishe (omugyenzi) arikurya kyakiro n’abaijukuru be. Nikigambwa ngu akwatsire omuhoro nikwo kutema ishe mpaka amwitsire atyo akahunzya agye.

Okurugiirira ahari Pooriisi, omugyenzi nagambwa kuba yahabaabiire omutabani ngu namwibiira omwani kandi eki kinyigize omutabani nikwo kumutema akamwita.

Omutumbi gw’omugyenzi gutwitwe omu kabafu ah’eirwariro erya Kabwohe health centre IV kukyeberwa obwo okucondooza kurikugyenda omu maisho.

#WestUpdates