Dr. Kiiza Besigye kuhumura eby’obutegyeki

Dr. Kiiza Besigye kuhumura eby’obutegyeki

N’ebya Caleb Bahikaho

Rukungiri:

Col. Dr. Kiiza Besigye, owabaireho purezidenti w’ekibiina ekya FDC kandi owayetsimbire ahabwa Purezidenti emirundi 4 agiizire ngu naija kuhumura eby’obutegyeki emyaka ebiri omumaisho.

Besigye, 67, oyaakirwe omu kitiinisa omuri Rukungiri eizooba erya nyomwabazyo agiizire ngu nahitsya emyaka 68 okwezi okurikwija kandi naija kuhumurira ahamyaka 70 y’obukuru nk’oku Baiburi erikuhabura.

Besigye ebi abigambire obu abaire ari omu rukiiko rw’okwebuzaho ahabw’ekibiina ekya FDC omuri Rukungiri.

Ogu naagira ngu ekigyendererwa kye n’okureeba abanya Uganda nibaruga omu buhuka atakahumwire.

Abeebembezi kuruga omu disiturikiti eza Rukungiri na Kanungu bashabire Besigye kugaruka kwetsimba 2026, ekibiina kya FDC kyaheeza kugarurwa busya.

#WestUpdates