Omusumba Paul Ssemwogerere bino abyogeredde ku mukolo gw'okugatta abagole Patrick Ssevvume Ddamulira ne Venerah Nakiwala ogubadde ku Kigo ky'e Nattyole ku Lwokutaano nga gwetabiddwako abasosodooti mikwano gy'abagole okuva mu bigo eby'enjawulo.
Omusumba agambye nti abagole bafunye omukisa obutasasaanya buwanana bwa ssente olw'okuba nti abantu batono ddala abeetabye ku mukolo era nga baawonye n'okugeyebwa abantu abangi ababeera ku mikolo nga beenoonyeza ebyabwe.
Asabye abafumbo okutuukiriza obuvuunaanyizibwa bwabwe obw'enjawulo omuli okwagala amaka nga Kristu bw'ayagala Kelezia, n'agamba nti balina okuba eky'okulabirako mu maka beewale engombo ya 'nfumba lw'abaana'.
Abakuutidde n'okusonyiwagana, ensonga zaabwe bazizze mu Kleziya okuzigonjoola ssinga babeera bafunyemu obuttakkaaya.
Mu ngeri y'emu era omusumba ajjukiza abazadde obuvuunaanyizibwa bwabwe obw'okugunjulanga abaana n'okubassa mu masomero gavumenti bw'eneeba egagguddewo.
Ku ky'okuggula amasinzizo agambye nti bakwasiza wamu n'ekibiina ekibagatta ekya Inter religious council okuteeseganya ne gavumenti kyokka ng'ekibuuzo ekyebuuzibwa kwe kuba oba ng'abantu banaagoberera amateeka agassibwawo.
Asabye abantu bonna okugoberera ebiragiro bya gavumenti omuli okwewa amabanga n'okwambala nga masiki buli kadde.
