TOP
  • Home
  • Ssenga
  • Osama bin Laden - Abadde amaze emyaka 10 nga yeekwese kyokka essimu yamuwaddeyo mu balabe be!

Osama bin Laden - Abadde amaze emyaka 10 nga yeekwese kyokka essimu yamuwaddeyo mu balabe be!

Added 4th May 2011

DDALA eyattiddwa  yabadde bin  Laden? Bw’aba gwe basse lwaki baamuziise kimpukumpuku ne balemwa n’okutulaga obulungi omulambo gwe?
Abamerika  okusuula omulambo gwa bin Laden mu nnyanja  kiki kye baabadde bakweka?
Bino bye bimu ku bibuuzo  Kalondoozi bye bambuuzizza okuva bin Laden

DDALA eyattiddwa  yabadde bin  Laden? Bw’aba gwe basse lwaki baamuziise kimpukumpuku ne balemwa n’okutulaga obulungi omulambo gwe?
Abamerika  okusuula omulambo gwa bin Laden mu nnyanja  kiki kye baabadde bakweka?
Bino bye bimu ku bibuuzo  Kalondoozi bye bambuuzizza okuva bin Laden lwe yattibwa ku Ssande era ne njagala nnondoole engeri Osama bin Laden,  gy’azinyizzaamu Abamerika oluguje mu bulamu ne mu kufa!
Omuyiggo gw’okutta  Osama  Bin Laden  gumaze emyaka egisukka mu 20. Ekyebuuzibwa nti ku nsimbi ne tekinologiya Amerika gw’erina lwaki bin Laden abuze ebbanga lino lyonna? Kisoboka kitya nti bin Laden abadde mu Pakistan , eggwanga eririna enkogana ne Amerika ne kibalema okumanya?

Osama asobodde atya okwekukuma mu Pakistan?
Amaka Osama mwe yattiddwa mu kibuga Abbottabad, gali kinnya na mpindi n’ettendekero ekkulu ery’amagye  erya Pakistan Military  Academy.
Wabula omubaka wa Pakistan e Bungereza, Wajid Shamsul Hasan,  agamba nti  Gavumenti yaabwe ebadde tekimanyi nti bin Laden  ali ku ttaka lyabwe!
Pulezidenti Bush  bwe yalangirira omuyiggo gwa bin Laden era n’assaawo obukadde bwa ddoola 50 okumukwata  oba okumutta, mu kiseera ekyo kigambibwa nti bin Laden yali yeekukumye mu Afghanistan ng’akuumibwa Abatalebaani.
Amerika bwe yalumba n’ekuba Abatalebaani n’ebaggya mu buyinza mu Afghanistan mu 2003, bin Laden yadduka okuva ku kibuga Kabul n’abakulembeze b’Abatablebani  ne beekuukuma mu  nsozi ez’e Tora bora. Omuyiggo gwanyiinyittira, ennyonyi za Amerika eza buli kika  ne zirumba ebibuga eby’enjawulo omuli Kandahar, Herat, Khowst, Jalalabad, Ghazni okunoonya bin Laden ne birema.
Okusobola okwekweka Abamerika, bin Laden  yaggyako amasimu, kompyuta n’ebyuma ebirala ebyempuliziganya era ebbanga lyonna abadde akozesa bantu b’atuma  n’okuwandiika obubaluwa okuwa ebiragiro n’okuduumira ebikwekweto.
Okuva mu 2005   okutuuka lwe yattiddwa bin Laden abadde mu Pakistan kyokka nga tabeera mu kifo kimu wabula ng’akyusakyusa okusinziira ku magezi agabadde gamuweebwa bambega be mu bitongole bya Pakistan ebikessi .
Era mukazi we omuto gwe yasangiddwa naye yayogeredde ku leediyo y’e Bungeereza eya BBC n’agamba nti e Abbottabad babadde baakamalayo emyezi mitono.
Mu 2007, bin Laden yasimatukka okuttibwa oluvannyuma lwa Amerika omumuketta mu mpuku eziri mu nsozi z’e  Hindu Kush mu Pakistan. Wabula Pulezidenti Bush yagenda okumuyungira ennyonyi, zaakuba bbanga ng’afunye abamubbirako n’ayotta.
Ab’ekitingole kya Amerika ekikessi ekya CIA bagamba nti bin Laden asobodde  okwekweka ebbanga eryo lyonna  olw’obukuumi bw’abadde afuna mu bannalukalala ab’enjawulo abatwala ebitundu bya Pakistan eby’omu nsozi ku nsalo ne Afghanistan. Abadde abawa ssente  era nga bamukkiririzaamu.

Ani yalidde mu bin Laden olukwe?
Bin Laden bwe yava ku masimu ne kompyuta, yafuna abantu  b’atuma kyokka nga nabo abeekengera nnyo.
Okumanya abadde mugezi ne ne bakamando be aba al Qaeda nga tebamanyi w’abeera,  teboogera naye butereevu wabula nga bamulinda ye lw’alibaweereza ebiragiro ng’ayita mu bubaluwa oba okubatumira omuntu.
Wabula ekyewuunyisa , essimu bin Laden ze yali yeewala ze yaamuzaalidde embeteza. Essimu eyo, bin Laden si ye yagikuba oba okugikwata wabula  omuyambi we ow’okulusegere.

Olukwe lutandikira  mu kkomera ly’e Guantanamo Bay
Mu basibe abangi Amerika be yayoola mu Afghanistan, Pakistan n’amawanga abalala oluvannyuma lwa September 11 2001 mwe muli  basajja ba bin Laden abaakoze akamantaalo ne bavaako okumutta!
Okubaggyamu amawulire ago  tekyali ku kakeeka,  wabula baasooka kutulugunyizibwa ab’ebyokwerinda okumala emyaka nga bagaanyi okwogera.
Amawulire ag’omugaso  abasibe abo  baagawa mu 2005  oluvannyuma lw’okutendewalirwa  ng’ebibonyoobonyo  bibasusseeko. Ebimu ku bibonyobonyo  bye baabakolako mwalimu; okubatuga, okubannyika  emitwe mu mazzi, okubalemesa okwebaka, okubateera embwa enkambwe ne zibalumaaluma n’ebirala.
Ku basibe abaatulugunyizibwa mwe muli eyayogera nti bin Laden alina omuyambi we gwe yeesiga era gw’atuma  okutwala obubaka obuwandiike n’okumuddiza obubaka era obuwandiike kyokka ng’erinnya lye talimanyi.
Abasibe abalala nabo baayamba era bye baawa Abamerika bye baagattagatta ne basobola okumanya omuyambi ono.
Omu ku basibe  Hassan Ghul eyakwatibwa mu  Iraq mu 2004 yategeeza aba CIA   omuyambi oyo yali akolagana butereevu ne Faraj al-Libi, gwe yali atuusizaako obubaka  okuva ewa bin Laden olwo ne busaasaana mu baduumizi ba al Qaeda.
Mu May wa 2005, al-Libi yakwatibwa  era bwe yatulugunyizibwa n’ayogera byonna kyokka n’agaana  okwogera erinnya ly’omuyambi wa bin Laden

Sheikh  eyakwasizza bin Laden
Aba CIA kyabatwalira emyaka ena okuzuula  omuyambi  oyo n’okumanya erinnya lye ettuufu. Aba CIA  baamuzuula nti ye Sheikh Abu Ahmed, enzaalwa y’e  Kuwait kyokka ng’alina obutuuze bwa Pakistan. Omusajja ono asinga kukozesa linya lya Abu Ahmed al-Kuwaiti okusobola okubuzabuza abamunoonya. Ono aba CIA gwe babadde balinnya akagere.
Wabula okuzuula omuyambi ono n’ebimukwatako Amerika yasaasaanya akakadde ka ddoola mu bantu ab’enjawulo.
Olw’okuba bin Laden yali yagaana omuyambi we ono okukozesa amasimu oba kompyuta ng’ali ku misoni,  aba CIA baabonaabona okufuna kye baagala era oluusi nga bamalanga emyezi nga tebamulaba.
Mu August wa 2010, Sheikh Ahmed  mu butanwa yayamba  bambega bano okumanya wa bin Laden  we yali yeekukumye. Kino Ahmed yakikola  tagenderedde kubanga   aba CIA  baamutega essimu , bwe yagikwata ne bamanya nti ye muntu gwe baludde nga banoonya, ne bamulinnya akagere okutuuka lwe yayingira  mu ggeeti ya bin Laden e Abbottabad.
Okuva olwo aba CIA ne baatandika okuketta ennyumba eyo, bin Laden baamulaba enfunda eziwera mu luggya naye ne batamuwereekereza bbomu  nga tebannakakasa nti ddala ye muntu gwe banoonya.
Ne Sheikh Ahmed  baasigala bakyamulondoola, ebifo mwe yagendanga, be yayogeranga nabo ate nabo ne babalondoola.

Bakakasa nti ddala bin Laden bamuzudde
Ekimu ku byabakakasa nti bin Laden bamuzudde kwe kubanga nti ennyumba ye yali ya bbeeyi nnyo kyokka nga teriiko waya ya ssimu oba masannyalaze  ne bamannya nti kirabika waliwo ekintu ekikulu mu nju eyo.

Lwaki bin Laden tebaamukutte nga mulamu?
Buli kibadde kigenda mu maaso Obama abadde akimanya era mu February wa  2011,  bambega baali bamaze okukakasa nti ddala bin Laden bamulina nga balina Obama kubawa lukusa bakole misoni.
Aba CIA baali baagala Obama abakkirize bayungule ennyonyi  nga 30 zikube  bbomu ku nnyumba ya bin Laden, ebulire mu ttaka kyokka Obama n’agaana ng’agamba nti kisoboka bin Laden okumukwata nga mulamu.
Misoni y’okulumba yakoleddwa  ku nkomerero ya March  ng’ekigendererwa kya kumukwata .  Wabula eby’okumutwala nga bwe baakola Saddam Hussein, bin Laden  yabigaanye ne bamutta.

Osama bin Laden - Abadde amaze emyaka 10 nga yeekwese kyokka essimu yamuwaddeyo mu balabe be!

More From The Author

Emboozi z’omuwandiisi endala

Emboozi endala

Omulimu gw'okuddaabiriza Nk...

Abaasomerako ku ssomero lya Nkumba P/S bayingidde omutendera ogw'okusatu mu kuddaabiriza ebizimbe ku ssomero lino...

UGANDA EKWATA KISOOKA MU AF...

OMUWANDIISI w'enkalakkkalira mu minisitule y'ebyobulamu Dr Diana Atwine abugaanye essanyu oluvanyuma lw'okufuna...

Joseph Nuwashaba ng'atwalibwa mu kkooti

Eyakwatibwa ku by'omwana ey...

Omusajja agambibwa okutemako omwana Faith Kyamagero ow'emyaka 4 omutwe aleeteddwa mu kkooti.

Omwana eyasalibwako omutwe ...

Omwana eyasalibwako omutwe e Masaka ne bagutwala ku Palamenti aziikiddwa

Ssebbumba eyakubiddwa lwa bubbi

Abadde mu jjaamu e Kawempe ...

Abadde mu jjaamu e Kawempe bamukubye mizibu