Ceeyamaani w’ekyaro aitsirwe omuri Ibanda.

N’ebya Beth Akatukunda

IBANDA

Pooriisi omu disiturikiti ya Ibanda eriyo necondooza okufa kwa Katabarwa William, 50, ceeyamaani w’ekyaro kya Akeigumba omu divijoni ya Bufunda omuri Ibanda Munisiparite orikuteekateekwa kuba aitsirwe.

Nikigambwa ngu aha Sande ebiro 15/10/2023 shaaha nka 9 z’eihangwe, omugyenzi arugire omuka yatwara enshaho emwe y’omwana aha fakitore omuri Ibanda kugiguza kandi agarukire shaaha nka 12:30 z’omwabazyo. 

Ahari shaaha nka 1 y’omwabazyo, Katabarwa agambiire omukazi we, Kembabazi Josephine ngu ariyo nagaruka omu ka tauni ka Rwamanyonyi nk’oku atwire nakora omu bwire bw’omwabazyo beitu abaire nakira kugaruka omuka zitakarengire shaaha 2 z’ekiro. 

Ahari shaaha 4:30 z’ekiro, omukazi we agiire kubyama beitu ku asimukire shaaha 7 z’ekiro yashanga omushaija atakaizire.

Amuteeriire aha simu beitu ebaire etarikurabamu kandi tihaine obaire nagikwata. Agarukire yamuteereraho shaaha 9 z’ekiro, nabwo abaire atarikukwata.

Ahari shaaha nka 11:30 burikusheesha, acwiiremu kuza kumanyisaho munywani we, Katakanya nikwo kugyendana omu ka tauni beitu tibamurebireyo. Ku babaire nibagaruka omuka, omuramu yabagira ngu haine omuntu abaire afeeriire omu kashozi kandi ku bahikire kuhikayo bashanga ari omushaija we.

Samson Kasasira, Omugambirizi wa Pooriisi ahabw’ekyanga ekya Rwizi naagira ngu Pooriisi ya Ibanda emanyisibwe ahanshonga egi egyenzire ekaihayo omutumbi ekagutwara omu kabafu ah’eirwariro erya Ruhoko health center 4 kukyeberwa.

Kasasira naagira ngu tihaine muntu weena owakwatsirwe beitu okucondooza kuriyo nikugyenda omu maisho.

#WestUpdates