Amasomero galaze ebirungi n’ebibi eby’okusomera mu mpalo / mu bitundutundu

Enkola eno efaanagana n’eyo gavumenti gye yaleeta mu bonna basome wa siniya mu 2007 abaana bwe baali baddayo mu masomero. Olw’omujjuzo okubeera nga gwaali gweyongedde mu masomero agasinga, gavumenti kwe kusalawo mu 2008 okuleeta enkola y'okusoma ekitundu ng'abayizi abamu basoma kumakya ate abalala lwa ggulo.

Abayizi mu kibiina

Enkola eno yalondobamu amasomero agamu mu ngeri y'okugezesa okulaba oba enaakola bulungi olwo eryoke esaasaanyizibwe mu masomero ga gavumenti amalala.

Mu kiseera kino minisitule yakakasizza ng’amasomero agasinga bwe goolekedde okukozesa enkola eno mu kugezaako okutangira omujjuzo gw’abayizi mu bibiina.

Edward Kanonya akulira Kololo SS agamba nti okuva ku S.1 okutuuka ku S.3 basoma okuva ku ssaawa 2:00 ez'oku makya okutuuka ku 7:45. Ate S.4 okutuuka ku S.6 ne batandika ku 8:00 okutuuka ku 11:00.

Enkola eno yatandikibwa mu 2008 era nnungi kubanga abayizi bangi bafuna omukisa okusoma ate n’ebikozesebwa kati bibamala bulungi.

Twesanga nga tetulina busobozi bugabira bayizi kyamisana, ng'oluusi basiiba njala ekibalemesa okuyiga obulungi naye kati baddayo eka ne balya ate abasoma olw’eggulo nabo bajja balidde.

Edward Kanonya akulira Kololo SS

Enkola eno ewa abayizi omukisa okubaako ebirala bye bakola ng’abamu bakolamu emirimu mwe baggya fiizi zaabwe. Abayizi ba funa obudde obumala okwesomera ku lwabwe n’okutumbula ebitone byabwe.

Obuzibu bwe tusanze mu nkola eno, oluusi tukaluubirizibwa okumalayo sirabaasi kuba abayizi basomako kitundu. Kye tuva tusaba minisitule y’ebyenjigiriza n’etukkiriza okusomesa ku wiikendi. Olw'okuba obudde buba butono, abayizi tubawa obudde butono okwogera ku bizibu byabwe.

Hajati Aminah Mukasa akulira Kololo High School agamba nti abayizi ba S.3, S4 ne S.6 basoma okuva ku ssaawa 2:00 ez'oku makya okutuuka ssaawa 7:00. Abasigadde basoma okuva ku ssaawa 7:00 okutuuka ku 12:00 ez'akawungeezi.

Ebikozesebwa byali bitutawaanya naye kati bitumala. Naye obuzibu obukirimu, eby'okusoma bibeera bingi era essomo ery’eddakiika 40, wano tusomesaako eddakiika 30 kubanga tuba n’obudde butono.

Kizibu okumalayo sirabaasi kuba obudde buba butono ate n'enkolagana y'omwana n'omusomesa ekendeeramu. Mu nkola eno, abasomesa basomesa obudde bwonna awatali kuwummula ekintu ekibakooya.