Ennaku nga Ssekukkulu tezandikuyiseeko nga tolina ky’otunda

ENNAKU zino enkulu eri e Bulaaya gye zaava tebazikola kulya buli mmere na kusanyuka kyokka, wabula guba mukisa gwe nnyini era omunene okukoleramu ssente.

Zino z’ennaku omuntu lw’akola ssente ezisobola okumutambuza okumala emyezi ng’esatu ng’akyalya kw’ezo.

Nnina omunene omu wano mu ggwanga gwe bang’amba nti yatandiikiriza mpola okulunda embuzi era ekiseera bwe kyayita n’agutwala ng’omulimu mw’aggya ssente eziweerera abaana.

Ssebbowa

Kyokka oluvannyuma omulimu gwagejja ne yeesanga nga gwe guvaamu ssente ezimuwoomeseza obulamu n’alambula ensi kyenkana okugimalako.

Bwe yali atandiikiriza, banne baamujerega nnyo nga bamugamba nti by’ayingiddemu temuli era singa gwali bwe gutyo singa buli muntu ky’akola. Mbu embuzi teziyinza kuvaamu nsimbi zeegasa.

Omusajja ono yalemerako n’asalawo alunde embuzi ng’akatale atunuulidde ka sizoni
oba ziyite ennaku nnya zokka mu mwaka.

Kino bw’okiwulira oyinza okugamba nti naye nga ddala lwaki omuntu ayagala okukolerea ennaku nnya mu mwaka!

Naye ng’ekituufu kiri nti yanoonyereza era n’akizuula nti embuzi basinga kuzettannira mu nnaku enkulu, era ng’ennaku enkulu ezo mu Uganda ziri nnya.

Ennaku ezo mwe muli Ssekukkulu eno eyengedde, ne mubaamu Paasika ate ne mubaamu ne Iddi bbiri – Eid al-fitr ne Eid al-Adha (Elifitri ne Aduha oba ziyite eyeekisiibo n’ey’okusala ebisolo).

Yasooka kutundangayo embuzi ze nga 50 ku buli nnaku zino ne kitegeeza nti mu mwaka yatundanga embuzi nga 200. Kino kitegeeza nti singa aba azitunze ku ssente
entono ennyo, nga bamudondodde ate ekitali kyangu, buli emu n’agitunda emitwalo 20 (200,000/- ) awo omwaka aba alina obukadde bwe 40 (40,000,000/-). Kituufu gano gonna si magoba naye era aba ali mu ssente ezeegasa.

Kyokka ekiseera kyatuuka ng’asobola okutunda embuzi 100 buli lunaku olukulu. Kati
teeberezaamu ssente z’akola mu nnaku ennya ziri eza Ssekukkulu, Paasika ne Iddi zombi, El-fitri ne Aduha.

Kino nkireese okukulaga nti waliwo abantu abakola entegeka era enteekateeka ezo ne zibafunira.

Bw’oba ogenze mu basuubuzi nabo balina sizoni zaabwe mwe bakolera ssente ennyingi ate era ne babaako ne sizoni ezitabaamu ssente, naye olw’okuba oluvannyuma
lw’okufuna obumanyirivu bagumiikiriza sizoni embi ne bagiyitamu, ennungi n’ebasanga ne baddamu ne beeyagala.

Kyokka olw’okuba bakimanyi nti essanyu teribeerera, ensimbi ze bafuna mu sizoni ennungi bazikwata bulungi zisobole okubatambuza okutuuka ku sizoni ennungi eddako.

Wabula eyaakayingirayo, naddala ng’ayingiridde mu sizoni enzibu, bwe bigaana adduka mangu ate aba yaakavaayo ate sizoni endala ennungi n’etuuka.

Oluusi amanya kyokka nga takyayinza kuddayo ate olulala bambi tabimanyirako ddala n’asigala nga yeewuunya abantu abakola bizinensi ezitafuna kyokka ne baziwangaaliramu.

Ono Atunda Nva Ndiirwa

Naawe kennyini ennaku nga  zino osobola okuzeetegekera n’oba ng’osbola okuzifunamu ensimbi oboolyawo ezikuyisa mu ttundundutundu ly’omwaka nga weeyagala.

Ebintu oba emirimu egimu gyetaaga okuba ng’ozze ogikola okumala akabanga sizoni ekusange nga weetereeza dda ng’era bwe tuzze twogera nti omukisa gusanga
yeetegese, ate endala osobola okuba ng’ogitandika sizoni eneetera okutandika, kyokka nga nayo oteekwa okuba nga wagitegeera bulungi ng’omanyi bw’etambula.

Abasajja n’abakazi abategeka ebivvulu bamanyi sizoni embi era omusanga n’olowooza nti eby’ebivvulu yabivaamu, kyokka sizoni ye bw’etuuka ogenda okuwulira
nti ye yategese eky’egindi era kyakutteyo.

Ono aba omulimu yaguyiga era ng’amanyi n’ebitundu gy’akolera n’afuna n’abayimbi abantu mu bitundu ebyo be basinga okwagala.

Kyokka era wadde obudde bulinga obuweddeyo naawe afunye ekinyegenyege totya okyalina ebintu by’okyasobola okwenyigiramu naawe n’okwata ku ssente za Ssekukkulu.

Ate era leka kutya butafuna, kubanga ne bw’oba tofunye ate obaako eky’okuyiga ky’oba ofunye ate ekijja okukuyamba ku Paasika oba ku Iddi ejja.

Kye njagadde okukutegeeza olwaleero kiri nti buli lw’owulira olunaku wandibadde tolukkiriza kukuyitako nga tolukozeemu ssente, nga kino okukikola obulungi
oteekwa okuba nga wakoze entegeka esaanidde.

Waliyo bannaffe ab’entegeka ennene ng’oli gwe nnakuwadde ow’embuzi, waliwo alina enku, waliyo ayiisa omwenge, waliyo ow’enkoko, waliyo eyasiba ettooke, waliyo aleeta ebyambalo, nnalabyeyo abateekawo akatale k’ebintu abaana bye bazannyisa. Naye ggwe mukwano gwange asoma bino oteze otya?

Bw’oba ku mulundi guno bigaanye, tokkiriza Paasika kukuyitako.
ENGERO Z’ABAGAGGA: Eyeeterekera butera okukya.