Emidumu egitambuza amazzi okuva e Katosi gizzeemu okwabika

Abasuubuzi abakolera mu Kabuga k’e Seeta balaajanidde ab’ekitongole ekivunaanyizibwa ku mazzi mu ggwanga ki National Water and Sewerage Corporation okusalira ekizibu kya pipe zaabwe ezaabika buli olukya amagezi, okwewala okufiirizibwa obuwanana n’obuwanana bw’ensimbi.

Bano okuvaayo okwekubira omulanga, kidiiridde oluvannyuma lwa pipe endala ezimu kw’ezo ennene ezaakassibwawo okubunya mazzi mu bitundu by’egwanga lino eby’enjawulo agava e Katosi okuddamu okwabika, nga guno mulundi gwa kusatu nga pipe zino zibomoka olwo amazzi agabeera ag’amaanyi ennyo ne gayingira mu maduuka gaabwe ne gakululusa ebintu byaabwe n’okubonoonera emmaali yaabwe.

Abasuubuzi bano basanze akaseera akazibu okutaasa emmaali yaabwe eyiseemu amazzi era ng’abasinze okukosebwa b’ebo abalina zi supermarket ng’amazzi goonoonye ebintu byaabwe awamu ne zi laptop abatunda engoye,eby’amassanyalaze, ab’amaduuka abatunda emmere empime naddala obuwunga, abatema n’okutunda enyama,n’ebintu ebirala bingi nnyo ebyayonoonese.

Abamu ku bano era balabiddwaako nga balaajana olwa puleesa y’amazzi gano ebadde ennene ennyo ekuddemu n’enzigi z’amaduuka gaabwe.

Ebintu eby'onooneddwa amazzi

Omu ku bano Ronah Adikini ategeezezza nga bwe basoose okwekubira enduulu  eri ab’ekitongole kino ng’amazzi tegannaba kubeera mangi kyokka ne beesuulirayo ogwa naggamba.

Abasuubuzi bonna boogezza eddoboozi limu ne basaba ab’ekitongole ky’e by’amazzi okuvaayo okulaba nga babaliyirira olw’ebintu byaabwe eby’ensimbi ezisoba mu bukadde 10 ebyayonoonese.

kansala akiikirira ekitundu kino ku lukiiko lwe Goma Moses Bukenya, alaze obwenyamivu olw’engeri abakozi b’ekitongole ky'amazzi kino gye bakolamu emirimu gyabwe ey’ekibogwe etuuse okufiiriza abasuubuzi, n’abasaba okukyuusa mu nkola yaabwe n’okuliyirira abaakoseddwa.

“Ab’ekitongole ky’eby’amazzi balina obunafu bwe boolesezza bwe tubadde tutalowoozangako, twaali tubasuubira okukebera nga ku pipe zino buli luvanyuma lwa myezi nga esatu naye ekyo kya balema.

Bbo abakulu abakulira ekitongole kya NWSC oluvanyuma bazze ne badaabiriza pipe eyabadde eyabise wabula nga baagaanye okubaako ne kye boogera ku nsonga eno.