Ssempijja ne Lule Mawiya battunka mu Kalungu East

Ssempijja agamba nti ebisanja bisatu by'akulemberedde Masaka  amukyusizza ekifaananyi n'amuzza ku maapu naddala mu by'obulamu, ebyenjigiriza n'enguudo.

""Mbasaba mukube ttooki emabega we nnakwatira enkasi ya Masaka, enguudo bwe zaafaanananga, bannaffe bo ab'e Lwabenge, baali mu kazinga ng'enguudo oluva e Lukaya terutuuka miwuula, okuva e Miwuula okudda e Gomba ng'emmotoka tezikyatuuka Bugomola,"" Ssempijja bwe yategeezezza.

Yannyonnyodde nti emigga nga Nabajuzi, ogwattanga abantu buli nkuba lw'ettonnya, ogw’e Kyamuliibwa nga tebatuuka Kalungu n'emirala e Masaka  giteredde n'enguudo.

Yabyogeredde mu nku-ng'aana ze yakubye mu maggombolola ey'e Bukulula n’e Lwabenge ng'asaba obululu mu kammyufu ka NRM.

Enkiiko z’okunoonya akalulu mu Kalungu East baazitandikidde Lwabenge, Kiragga ne Bwesa.

Kyokka Umar Lule Mawiya e Kiragga yatuuse  kikeerezi nga Ssempijja amaliririza okweyogerako.

Mawiya bwe yatandise okwogera n’avumirira  bwe bavuganya  Ssempijja ekyanyiizizza  abawagizi ba Ssempijja katono basikambuleyo Mawiya ku kadaala nga bawakanya akubiriza enkung’aana zino, Mw. Ttendo Ssemwanga Lutaaya obutamuggyako  kazindaalo ng’amenya amateeka g’obutavvoolaganira ku budaala.