Endongo ya Lutalo erinnye bamaama ku mitwe ne basuulawo babbebi b'emyezi ena: Abadigize babatabukidde

Omwana eyasoose okubula yalondeddwa n'aweebwa kazannyirizi Ssenga Ssebbanga ng'ono yamusitudde okumala ebbanga n'abamu ne batuuka okumuloweereza nti yandiba ssekawere oba ng'alina akalimu k'aliko ak'okukola obwa yaaya!

Wabula ono yalabye nnyina w'omwana talabika n'amusitula n'amutwala ku siteegi n'amukwasa omu ku bakalabaalaba b'ekivvulu kino Judith akola pulogulaamu ya Kasalabecca ku Bukedde TV 2.

Judith Owa Bukedde Tv Ng'ali N'omwana Eyasoose Okubula Ku Nnyaabwe

Ne Judy yasitudde omwana n'atuuka n'akoowa okutuusa lwe yabaddeko gw'amukwasa naye ng'era maamawe talabika. Yalabye obudde bugenda n'agenda asaba Lutalo alange omwana ono wakati mu ndongo bakira esindogoma. Lutalo teyabadde mubi naye n'alanga omwana.

Wabula ate ekyo abamu ku badigize kyabaggyeko waya ne bacwana olw'okuyimiriza endongo mbu balanga mwana. Bano bakira bagamba nti balanga abaana ekivvulu ky'abaddeko n'okugema abaana!

Omukazi Eyavuddeyo N'anona Omwana Eyasoose Okulangibwa Nga Bamaze Okumumuwa

Maama w'abaana yazze mpola ng'asotya ne yeesowolayo wabula baamusoyezza kajjogijjogi w'ebibuuzo okukakasa nti omwana wuwe sso tazze kumubba. Baabadde kye baggye bamukukwase ate ne wavaayo n'omukazi omulala nga n'amaziga gamuyitamu agamba nti naye omwanawe wa myezi ena abuze.

Olwo ate gwe baabadde bawadde omwana baamuyise balabe oba abadde atutte mwana atali wuwe. Wabula maama omulala y'ategeezezza nti oyo si ye y'abadde owuwe. Ono ng'aliko n'akaana akalala ka myaka ng'esatu yatudde wansi n'atandika okusiita ebigere ng'awoza kimu "nze nfudde, taata Junior ngenda kumugamba ntya!" Wabula twabadde tuli awo ne wavaayo omuzirakisa eyazze n'omwana.

Lutalo Ng'alanga Omwana Eyasoose Okubula, Nga Judith Owa Bukedde Tv Amusitudde, Ku Ddyo Ye Ssenga Ssebbanga

Wabula ate mu kifo ky'okwebaza okumuyamba okunoonya omwana gwe y'abadde alagajjalidde, yatandise kuwoza mbu tebamukuba bifaananyi mukozi wa gavumenti.

Okugezaako okumwogereza atubuulira amannya ge, gy'abeera, akolera wa era akola mulimu ki, twabadde tusiwa nsaano ku mazzi kuba yeeremye era ne yeeyoolayoola mpola ng'akwata ezzadde lye nga bw'assa n'ebikkoowe!

Ssenga Ssebbanga Ng'asitudde Omwana Eyasoose Okulondebwa Ng'ali Wakati Mu Bantu

Wabula si ku nnasiisi w'abantu eyabadde mu kivvulu kya Lutalo anti nga tolina na wooyisa kigere. Kati oba ate bbo abaana baayise wa okubula ku bannyaabwe?