Ssanyu : 'Abatannafumbirwa temupapa'

Nalabye ekifaananyi kyo ku mutimbagano ne kinfaananira bulungi kwe kunoonya ennamba yo ey’essimu ekuntuusaako...
Ng’onjagaza ki?

Anti ye mmwe embooko z’e Uganda, ze tukuba mu mawulire ne mubaako obubaka bwe muwa abantu..
Otyo....

Ku kunyirira kw’oliko, sooka otubuulire ky’okozesa ku kasusu ako....
Sirina ky’amaanyi kye nkozesa okuggyako okunywa amazzi agamala n’okukola dduyiro omusaamusaamu.

Abantu babuulire ku mannya go...
Nze Patience Nakintu, erya ‘Pesh dollars’ lirya ssente.

Okola mulimu ki ogwo ogukusasulira mu doola?
Nze ndi mutimbi wa ku mikolo.

Wamma, ye ndabika!
Nkulaba oyagala kulumba Amerika?

Ekyo sisobola kukikola naye nandyagadde okumanya langi esinga okukukolera 
Ebiddugavu ne bbululu binkolera.

Yiiiii... mbadde mmanyi naawe osibira ku ppinka ngabawala banno abalala
Anti tekiwoomera matama abiri.

Simanyi oli mufumbo?
Naakamaliriza okukyaza olulenzi lwange mu bakadde bange...

Nga nneesiimye okwogerako n’omugole.... 
Era kye kimu ku bintu bye sisobola kwerabira mu buluma bwange.

Olwo abatannafumbirwa,  obasuulayo kagambo ki?
Tebeesindika na kupapa kuba bajja kufuna mu kiseera ekituufu ate n’obugumiikiriza kikulu.

Ewuwo, osinga kwagala kulya mmere ki?
Enkoko ne piraawo.

Ye olina emyaka emeka?
Nnina 26 gyokka.

Wagwa mu bintu ng’okyali muto...
Ekitiibwa n’ettendo mbiddiza Mukama.

Obeera wa?
Mbeera Rubaga.

Ggwe ne banno, ssente muziriirako wa?
Mikwano gyange emitono gye nnina, zitera kutuwoomera nga tugenzeeko e Ntebe.

Bintu ki ebikusanyusa?
Okulya obulungi, okwewa emirembe, n’okugendako mu bivvulu by’ennyimba z’eddiini binkolera.

Ondabikira ng’omuntu atanyiiga?
Teri muntu ku nsi atanyiiga.

Olwo biki ebikunyiiza?
Saagala muntu antemako bigambo, okunsuubiza n’otatuukiriza kimpisa bubi.

Kunsiibudde, weebale akadde k’ompadde
Weebale kusiima.