Abahingi nibashaba gavumenti kukwatiraho abarikuhinga omu bwingi

Agnes Nantambi
Journalist @New Vision
Oct 12, 2023

Abahingi nibashaba gavumenti kukwatiraho abarikuhinga omu bwingi

N’ebya Thomas Tumwebaze

Kagadi:

Akakiiko ak’eby’obuhingi hamwe n’abeebembezi omu disiturikiti ya Kagadi nibenda gavumenti etandikye okushagika n’okukwatiraho abahingi abarikuhinga omubwingi nk’omuringo gw’okwongyera ahantaasya y’eihanga hamwe na disiturikiti ezi barikuba barikurugamu.

Ebi byagambwa ba memba b’akakiiko aka hamwe n’abeebembezi ba disiturikiti ya Kagadi obu baaba bari omukurambura ‘Mukyeya Organic Farm’ eya Denis Namara, omuhingi orikuhingira aha acres ezirikurenga 1,700 kandi arikuhinga ebihingwa ebitari bimwe na bimwe.

Abahingi omuri Kagadi nibashaba gavumenti okukwatiraho abahingi abarikuhinga omu bwingi..(Photo by Thomas Tumwebaze)

Abahingi omuri Kagadi nibashaba gavumenti okukwatiraho abahingi abarikuhinga omu bwingi..(Photo by Thomas Tumwebaze)

Yosia Ndibwami, ori mukuru w’entebe ya 5 ahabwa disiturikiti ya Kagadi naagira ngu omuhingi w’amaani Denis Namara ahingwireho okutunga obuhwezi okuruga aha disiturikiti ahabw’okuba nahinga omubwingi.

“Nituza kushutamisa kanso kandi egambe aha muhingi ogu rero tuhandiikire gavumenti yarwagati ebaase kumukwatiraho n’ebyoma nkaza tractor hamwe n’ebyoma by’okushukyerera ebihingwa bye,” Yosia Ndibwami arikugamba.

Denis Namara Bindeeba, omuhingi orikuhingira esente naagira ngu gavumenti obwire obwingi nekwatiraho abahingi abahansi kandi enagiriira abarikuhinga omubwingi.

Denis Namara Arikushoborora Ebimwe Ebi Barikukora Aha Farm Eya Mukyeya Organic Farm

Denis Namara Arikushoborora Ebimwe Ebi Barikukora Aha Farm Eya Mukyeya Organic Farm

“Omu bwire bw’omumaisho, twine enteekateeka y’okutandikaho ekyoma ekirikukora Avocado oil okuruga omu Hass Avocado eziturikuhinga, ekyoma ekirikukora shukaari okuruga omubikweijo byitu hamwe na za silos z’okubiika ebicoorii hamwe n’omuceeri gwitu nk’omuringo gumwe gw’okwongyeraho omutindo ahabihingwa byeitu,” Denis Namara nikwo agambiire akakiiko k’eby’obuhingi okuruga aha disiturikiti.

Namara nagumizamu agiira ngu okuhinga omubwingi nikirungi beitu kandi okutunga abakozi abarikubasa kukora aha acres 1700 nikimuteganisa munonga otiireho n’obutaba n’ebyoma nka za tractor hamwe n’ebikwato ebindi ebirikukozesibwa omukuhinga.

Jamada Magezi, orikukurira akakiiko ky’eby’obuhingi aha disiturikiti asiimire Denis Namara kandi yasiima omurimo ogukozirwe omuby’obuhingi aha faamu ye.

Magezi naagira ngu nk’akakiiko, nibaza kugumu barikumuheereza obuhwezi otiireho n’okweyongera okushaba gavumenti yarwagati okukwatiraho abahingi nk’ogu.

Omuti Gwa Hass Avocado Oguri Omu Farm Ya Denis Namara

Omuti Gwa Hass Avocado Oguri Omu Farm Ya Denis Namara

Eric Sunday, owajwekyera Diisi wa Kagadi naagira ngu offisi ye neija kutsindika abakugu omuby’obuhingi kandi bongyere bahandiikire gavumenti okurabira omu kanso ya disiturikiti nikwe omuhingi ogu abaase kutunga ebikwato kandi omurimo gwe gugumizemu kurungi.

Denis Namara nashaba abanya Uganda okwejumbira omukuhinga omubwingi nikwe babaase kwihamu kihango.

Namara naagira ngu omuntu yahinga Hass Avocado, naza kuba natunga esente nyingi omumyaka 50.

Denis Namara Bindeeba, ori omunyeishengero wa Uganda omu East African Community nahinga ebicoori aha acres 450, ebikweijo aha acres 1200, Hass avocado aha acres 100 hamwe n’omuceeri aha acres ezirikurenga 320.

Faamu ya ‘Mukyeya Organic Farm’ nekwata amagomborora 3 aharimu Ruteete, Mpeefu ya Sande tauni kanso hamwe n’egomborora ya Mpeefu kandi eine abakozi abarikurenga 1,000 obwe boona barikushashurwa burikwezi.

#WestUpdates

Related Articles

No Comment


(adsbygoogle = window.adsbygoogle || []).push({});