Balimwezo agamba nti Kasirye Ggwanga yamusanga mu ofiisi ye, n'amukwasa engule bbiri: emu Pulezidenti Museveni gye yamukwasa ng'awummula amagye mu 2018 n'endala gye yafuna okuva ku Kibuli SS mu 2013 nga bamusiima okubeera omu ku baasomerayo gattako ekitabo "1HE BELL 1990" ekimwogerako bwe yali mu ttendekero ly'amagye mu Amerika.
Ng'amukwasa ebintu ebyo, Balimwezo yagambye nti Kasirye yamukuutira okubikuuma obutiribiri kubanga byamuwendo. Yagambye nti kati asobeddwa ekyokukola kubanga Kasirye afudde tamubuulidde kyakukola n'agamba nti kati alinda kulaba oba byayogerwako mu kiraamo.
Balimwezo yategeezezza nti enkolagana ye ne Maj. Gen. Kasirye Ggwanga yatandika mu 2014 bwe baasisinkana ku leediyo emu n'amutegeeza nti yali aludde ng'amugoberera olw'engeri gy' alwanirira abantu baawansi.