TOP
  • Home
  • News
  • Bawanze omuliro mu kuziika Zebra Ssenyange

Bawanze omuliro mu kuziika Zebra Ssenyange

Added 2nd January 2021

Abaziisi nga baaziiranira ku ntaana ya Zebra.

Abaziisi nga baaziiranira ku ntaana ya Zebra.

OKUZIIKA Ssenyange ‘Zebra' kwabaddemu okuwanda omuliro wakati wa bannabyabufuzi n'abakubi b'ebikonde abaalumirizza ebitongole by'ebyokwerinda okutandika okutta n'okuggalira bannaabwe awatali nsonga nnambulukufu.

Pulezidenti w'ekibiina ekigatta abakubi b'ebikonde Moses Muhangi y'omu ku baatadde akaka n'agamba nti, "Twagala mutunnyonnyole lwaki abakubi b'ebikonde batandise okuttibwa ate abalala babuzibwawo mu ngeri etategeerekeka.

Mukimanyi bulungi ffe abeebikonde tetuli bannabyabufuzi era tusaba mutubuulire kye twakoze ekivuddeko bannaffe okuli Ssenyange okuttibwa mu bukambwe", Muhangi bwe yagambye.

Isaac Ssenyange ‘Zebra' yakubiddwa amasasi mu mutwe n'afiirawo mu kiro ekyakeesezza Olwokusatu era yaziikiddwa ku Lwokuna e Masuuliita - Kakazibwe mu Wakiso.

Mu kutta Ssenyange, abaserikale abaamusse baakutte munne Robert Mukasa Mugwanya ‘Soja Man' ne babulawo naye era gy'akuumirwa tewamanyiddwa.

Aba ffamire ya Soja Man nabo baasoose kusattira oluvannyuma lw'okufuna amawulire nti omuntu waabwe naye yattiddwa, omulambo ne gusuulibwa e Bombo, wabula bino poliisi y'e Luweero yabisambazze n'etegeeza nti tewali mulambo gwonna gwazuuliddwa Bombo.

ABEEBIKONDE ABALALA ABABUZIDDWAAWO
Abeebikonde abaakakwatibwa kuliko; Justine Jjuuko eyaliko kyampiyoni w'ensi yonna poliisi gwe yategeezezza gye buvuddeko nti yakwatibwa ku bigambibwa nti yali atendeka abayeekera n'okuyigiriza abavubuuka emmundu.

Abalala ye Joseph Lubega ‘Joey Vegas' eyaliko kyampiyoni wa Afrika, Mudde Ntambi, Yusuf Babu ngono ali ku ttiimu y'eggwanga ne Nicholas Katongole ono yayimbuddwa.
Ssenyange y'omu ku babadde batendeka abaana ebikonde, nga y'atendeka ne ttiimu ya Lukanga Boxing Club ne ttiimu ye eya Zebra Boxing Club.

Wabula wakati mu Mmisa abawagizi ba NUP baafunye obutakkaanya n'aba NRM nga buli ludda lugamba nti Zebra abadde waabwe.

RCC wa Kawempe Hood Hussein yagambye nti Ssenyange abadde mmemba wa NRM era ng'ayamba okulwanyisa obumenyi bw'amateeka mu kitundu, kyokka Mmeeya wa Kawempe Emmanuel Sserunjogi eyeetisse obubaka bwa Robert Kyagulanyi ‘Bobi Wine'.

Yagambye nti Ssenyange abadde mukwano gwa Bobi Wine ng'omuntu, ng'awagira enkyukakyuka mu ggwanga era nga y'atendeka n'abamu ku bakanyama abakuuma Kyagulanyi nti era ku by'akoledde eggwanga bagenda kumubbulamu oluguudo oludda e Nabweru.

Abeebikonde baategeseewo n'ebikonde ebyazannyiddwa ku ntaana okusiima Ssenyange by'akoledde omuzannyo gw'ebikonde.

Pulezidenti Museveni yakubagizza n'ensimbi 10,000,000/- ne poliisi nayo n'ewaayo ssente 10,000,000. Omugenzi yalese Nnamwandu Mercy Mukankuusi n'abaana basatu.

  • TAGS:

More From The Author

Emboozi z’omuwandiisi endala

Emboozi endala

Siraje Kiyemba Expert ng’alaga ebirabo by’atunda.

Kaadi n'ebirabo byongereko ...

OBADDE okimanyi nti ekirabo ky’otunda okwagaliza omuyizi okukola obulungi ebibuuzo eby’akamalirizo osobola okukyongerako...

Sheikh ng'annyonnyola okutalaka mu Busiraamu.

▶️ TAASA AMAKAGO: OKUTALA...

TAASA AMAKAGO: OKUTALAKA MU BUSIRAAMU KYE KI?

Lumbuye Nsubuga mmeeya wa Makindye Ssaabagabo (ku kkono), minisita Magyezi ne  Mbabazi RDC wa Wakiso nga balaga sitampu z’ebyalo ezaatongozeddwa.

▶️ Gavumenti etongozza si...

GAVUMENTI entongozza sitampu z'ebyalo, minisita wa Gavumenti ezeebitundu Raphael Magyezi n'alabula abakulembeze...

Owa LDU, Emmanuel Ogema (ku kkono), David Owiri (amuddiridde), Vincent Olenge ne Jakis Okot (ku ddyo) abaakwatiddwa.

▶️ Owa LDU bamukwatidde mu...

OMUJAASI wa LDU bamukwatidde mu kibinja ky'abakukusa amasanga n'ebitundu by'ensolo z'omu nsiko eby'omuwendo. ...

Papira (ku kkono), Acieng, Kobugabe ne Isaac Mukasa, akulira engule za Fortebet Real Star Monthly Awards. Mu katono ye Komakech.

Owa Hippos ajja kusinga Ony...

FLORENCE Acieng, nnyina wa ggoolokipa wa Hippos (ttiimu y'eggwanga ey'abali wansi w'emyaka 20), agambye nti mutabani...