TOP
  • Home
  • News
  • Ensiitaano y'okutaasa ttanibboyi emmotoka gwe yanyize etutte essaawa 11 nnamba

Ensiitaano y'okutaasa ttanibboyi emmotoka gwe yanyize etutte essaawa 11 nnamba

Added 23rd January 2021

Abantu nga balwana okutaasa ttaanibboyi eyabadde alaalidde mu byuma.

Abantu nga balwana okutaasa ttaanibboyi eyabadde alaalidde mu byuma.

POLIISI n'abadduukirize kyabatwalidde essaawa 11nnamba okutaasa ttanibboyi Abdu Sserunjogi ebyuma by'emmotoka gwe byabadde bikutte oluvannyuma lwa loole mwe yabadde okugwa ku kabenje e Lukaya ku luguudo lw'e Masaka.

Akabenje kano kaabaddewo mu kiro ekyakeesezza Olwokusatu loole bbiri bwe zaatomereganye bwenyi ku bwenyi.

Abaabadde balwana okutaasa ttanibboyi beegattiddwaako abasawo ba Red Cross abaawadde Sserunjogi obujjanjabi ng'ebyuma bikyamukutte okusobola okumutaasa obulumi obwabadde obungi.

Akulira poliisi y'ebidduka mu Greater Masaka, Godfrey Mwesigwa yategeezezza nti omugoba wa Scania nnamba KBV 757T/ ZD 4533 eyabadde ku misinde ye yatomedde Fuso nnamba UAV 928A.

Ddereeva wa Fuso, Alex Byanyima yasimattuse n'ebisago ebisaamusaamu nga n'abaaabadde mu Scania olwavuddemu ne beemulula ne badduka.

Akulira abazimyamwoto e Masaka, Sgt. Jane Watango n'abadduukirize baasombye ebyuma ebya buli ngeri n'ebiti bye beeyambisizza okugattulula ebyuma ebyabadde bikutte ttanibboyi kyokka ne balemererwa okutuusa bwe baakozesezza amasannyalaze ne babisala ne bisobola okwetaggulula.

Abasawo abaabaddewo baawakanyizza abantu abaabadde baagala bamutemeko ekitundu ky'okugulu ekyabadde kiwagamidde mu byuma nti bamuyamba obutafa nga bagamba nti kikontana n'enkola y'ekisawo eyawa omuntu kennyini omukisa okwesalirawo era ng'alina n'okussaako omukono okukakasa ky'asazeewo.

Ensiitaano eno yatandise ku ssaawa 6:00 ez'ekiro akabenje we kaabeereddewo okutuusa ku ssaawa 4:00 ez'oku makya bwe baasobodde okumuggyayo.

Abasawo ba Red Cross baamuddusizza mu ddwaaliro ekkulu e Masaka olwo poliisi n'eddamu okusiitaana n'okugattulula mmotoka zombi nga Fuso yabaddeko ebintu by'amaduuka so nga Scania yabaddeko kasooli ow'empeke.

                  Alex Byanyima Ddeereva Wa Fuso.

Ddereeva Byanyima yategeezezza nti owa Scania yamulumbaganye ku mukono gwe gye yamutomeredde ng'awugula mmotoka endala ey'amafuta eyabadde eweta ku ssundiro ly'amafuta n'amutwalaganya mu kiwonko.

Omubaka wa Gavumenti e Kalungu, Pastor Caleb Tukaikiriza yasabye abagoba b'ebidduka okwewala okuvugisa ekimama n'obutavuga ndiima bawen'abalala eddembe ery'okukozesa enguudo.

Abasuubuzi Abdu Wahab Lukwago, Michael Julunga ne Molly Namagembe ab'e Lyantonde beebazizza poliisi olw'okutaasa emmaali yaabwe n'etabbibwa kyokka ne banyolwa olw'eyatomedde abantu baabwe.

Abooluganda lwa Sserunjogi okuli, Aisha Nakagiri ne Haawa Najjuma amaziga gaabayiseemu nga batidde nti obulamu bwe buggwaawo.

  • TAGS:

More From The Author

Emboozi z’omuwandiisi endala

Emboozi endala

Ssekabembe ng’alaga ezimu ku keeki eziwedde okuyooyootebwa.

Ssekabembe eyatandika ne 25...

SINKANA Brenda Sekabembe alina emyaka 42 nga ye mutandisi wa kkampuni ekola keeki eya Bake for Me esangibwa mu...

Poliisi ng’ewalabanya omu ku baaziikudde omulambo gwa Ssali.

▶️ Poliisi egugumbudde abaa...

AMASASI ganyoose mu kuziika nga poliisi egumbulula ebbiina ly'abavubuka abeeridde omuguju ne baziikula omulambo...

Abamu ku basuubuzi abaalumbye ofi isi ya Kushaba.

▶️ Omukazi eyawambye akatal...

MINISITA wa Kampala alagidde omukyala Suzan Kushaba okwamuka mu bwangu ofi isi za KCCA ze yawambye ne yeerangirira...

Abakungu okuva mu kitongole ky’ebyobulamu oluvannyuma lw’eddagala erigema COVID 19 okutuuka mu ggwanga. Baabadde ku kisaawe e Ntebe.

▶️ Okugema Corona kutandika...

BANNAYUGANDA babagumizza ku ddagala erigema corona eryatuuse mu ggwanga nga bwe litalina buzibu eri obulamu bw'abantu....

Omugenzi Kalulu n’omu ku bakazi be.

Owa capati asse gw'asanze a...

OMUSAJJA ow'abakazi ababiri bamufumise ekiso n'afa oluvannyuma lw'okukwatibwa lubona ne muk'omusajja gw'agambibwa...