Omusuubuzi gwe baawambidde e Kasubi bamusanze Wobulenzi

Omusuubuzi mu katale k’e Kasubi, Henry Sematiko, eyawambiddwa okuva mu makaage agasangibwa e Kyengera ku luguudo oludda e Masaka, asangiddwa ng’asibiddwa emiguwa ng’asuuliddwa e Wobulenzi mu disitulikiti y’e Luweero.

 Sematiko ng'atwalibwa mu ddwaaliro e Mulago okufuna obujjanjabi. Ebifaananyi bya Stuart Yiga

Rehema Nakawooya, yategeezezza Poliisi nti, waliwo abasajja bataano abaabalumba ennaku z’omwezi nga May,25, 2018, awaka ne babakonkona kyokka olwaggulawo oluggi, bavumbagira bba mu bwangu obw’ekitalo ne babulawo naye nti kyokka ensonga yazitegeeza Poliisi n’aggulawo omusango ku fayiro namba CRB: 113/2018,  ne batandika omuyiggo.

Sematiko nga bamusitula okumuyingiza mu mmotoka okutwalibwa mu ddwaaliro e Mulago

“We twamuzuulidde yabadde teyeetegeera nga yenna asibiddwa emikono n’amagulu, nga bamusudde ku mabbali g’ekkubo we twamusanze ne tumutwala mu ddwaliro e Mulago okufuna obujjanjabi,” bw’atyo Nakawooya bwe yategeezezza Poliisi.

Sematiko nga yaakazuulibwa. Yasangiddwa aliggyiddwa emiguwa

Okunoonyereza okwakakolebwa Poliisi kulaga nti Sematiko, abadde musaale mu nkaayana ezigenda mu maaso mu katale k’e Kasubi era omuntu omu yakwatiddwa abayambeko mu kunoonyereza.