Obukenuzi bwa Grace ne Robert Mugabe ne

Omukago gwa Bulaaya bwe gwamuteekako natti okuva mu 2002 embeera y’okwejalabya n’ekendeera.

 Bamugabe

Omwaka gwa 2014, Grace yayita abawagizi be e Mazowe mu Harare n'abamatiza nti ebyo bye bagamba nti bba alina obulindo bw'ensimbi bya bulimba.

Bino yabyogera bayimiridde mu maaso gaamayumba amatiribona g'azimbye n'ategeeza abantu nti Mugabe ye pulezidenti asembayo okubeera omwavu mu nsi yonna. Era tamulabangako ng'asaba omuntu yenna ssente.

Yafumbirwa Mugabe mu 1996 ku mbaga kwe baasasaanyiza obulindo bw'ensimbi era yayongera okwewuunyisa bannansi bwe yakwata ssente gavumenti ze yali etaddewo okulaba nga bakendeeza ku nsimbi ze basasaanya nga basasulira awookusula ye n'azizimbamu ennyumba ya bisenge 30 n'agituuma ‘Graceland'.

Ekwata omwami tereka muganzi, ono teyakoma ku nnyumba, yasikiriza bba Mugabe n'asasaanya 28,000,000,000/- okumuzimbira Olubiri e China. Olumu yalinnya ennyonyi n'agenda e Bufalansa n'agula emigogo gy'engatto 3,000 ku ssente za Uganda 560,000,000/-.

Grace Mugabe ensimbi tazeeguya newankubadde nga bannansi bangi beeyaguza luggyo, amayinja ag'omuwendo agaawunda awakawe yagalagiriza Vietnam ku ssente 310,800,000/-, gaalubindi z'omusana n'essaawa z'asiba zigula bukadde.

Muwala wa Mugabe Bona bwe yali afumbirwa, kigambibwa nti baagana abakuba ebifaananyi okukwata ebiraga eby'obugagga bwabwe. Mutabani waabwe Bellarmine Chatunga yatadde ekifaananyi ky'essaawa ya ddoola za Amerika 60,000 n'ateekako obubaka nti, bino by'oganyulwa nga kitaawo afuga ensi.

Balina amaka e Hong Cong, Grace alagiriza empeta za diamond ez'ebbeeyi okuva ebweru.