Owa S6 bamugaanyi omulenzi we ne yetta

Owa S6 bamugaanyi omulenzi we ne yetta

OMUYIZI wa S6 yesse lwa bazadde be kumunenya ku mulenzi gw'abadde apepeya naye mu luwummula lwa Corona.

Sumayiyah Nabukenya 18, omuyizi wa S.6 mu ssomero lya Light College Mpigi avudde mu mbeera ne yetta ng'akozesa akakaaya ke lwa bazadde kumugaana omulenzi gw'abadde ayagala.

Nabukenya asangiddwa nga yeetugidde mu nnimiro okumpi n'ewa kitaawe ku kyalo kye Bukandagana A mu ggombolola y'e Kalamba mu Butambala era nga yakozesezza kakaaya ke yabadde yeesibye ku mutwe ne yeetugira mu kasaka okumpi n'ennimiro w'abadde alima.

Kigambibwa nti Nabukenya okwetuga entabwe yavudde ku bazadde be okumukomako ku mulenzi gw'abadde apepeya naye asobole okumaliriza emisomo gye olwo n'afuna okutya. Abamu ku batuuze baategeezezza nti Nabukenya abadde mugezi nnyo mu ssomero era nga y'omu ku bayizi abasinga bannaabwe era nga bazadde be bamulinamu essuubi nga kiteeberezebwa okuba nga yandiba nga yabadde afunye olubuto ekyamutiisizza ne yetta.