Buchaman awaddeyo ebyambalo by'amagye

OMUWABUUZI wa Pulezidenti ku nsonga za Ghetto, Mark Bugembe amanyiddwa nga Buchaman akwasizza ab’ebyokwerinda ebyambalo by’amagye bye yaggye ku bavubuka b’omu Ghetto n’akubiriza n’abalala okubiwaayo.

Buchaman ne mukyala we nga bakwasa abaserikale ebyambalo by'amagye.

OMUWABUUZI wa Pulezidenti ku nsonga za Ghetto, Mark Bugembe amanyiddwa nga Buchaman akwasizza ab'ebyokwerinda ebyambalo by'amagye bye yaggye ku bavubuka b'omu Ghetto n'akubiriza n'abalala okubiwaayo.

Bino yabibakwasirizza mu maka ge agasangibwa e Makindye mu Kizungu ku Lwokubiri n'ategeeza nti kino akikoze okugondera ebiragiro by'ebitongole by'ebyokwerinda abaalagidde abantu baabulijjo okuwaayo ebyambalo by'ebitongole bye by'okwerinda bye balina.

Buchaman ne mukyala we nga bawaayo ebyambalo.

Yagasseeko nti agenda kutalaaga Ghetto ez'enjawulo omuli n'ey'e Kamwokya okukung'anya ebyambalo bino n'okubuulirira abavubuka okukuuma eddembe n'okwagala ensi yaabwe kuba bangi ababirina.

Bino byonna obwedda bigenda mu maaso ng'abavubuka obwedda abeeyita ba kamanda b'omu Ghetto abaabadde bakung'anye bwe bawaga n'okuleekaanira waggulu nti "obuvako bwamwe bubwo tubuleese naye ffe tukyali baakabi ate tuli bakyamu".

Ebyambalo bino omwabadde yunifoomu z'amagye, engatto, emisipi n'ebirala Buchaman yabikwasizza ttiimu y'abaserikale eyabadde ekulembeddwamu omuduumizi wa poliisi (RPC) mu Kampala South, James Ruhweza.

Ruhweza eyasoose okusiima Buchaman okuba omuwulize yasabye abantu baabulijjo abalala abalina ebyambalo bino okubiwaayo nti kubanga babirina mu bukyamu era anaakwatibwako waakuvunaanibwa.