''Mukebere abalwadde endwadde ezibaluma nga tezinnaba kusajjuka'

AKULIRA eddwaaliro ly’e Mulago, Dr. Byarugaba asabye abasawo abalongoosa endwadde nga kkansa w’omu byenda essira baliteeke mu kukebera abantu bategeere abalina endwadde nga tezinnaba kusajjuka okusinga okubalongoosa okuwonya.

Omusawo ng'agezesa bwe balongoosa.

Bya Benjamin Ssebaggala 

AKULIRA eddwaaliro ly'e Mulago, Dr. Byarugaba asabye abasawo abalongoosa endwadde nga kkansa w'omu byenda essira baliteeke mu kukebera abantu bategeere abalina endwadde nga tezinnaba kusajjuka okusinga okubalongoosa okuwonya.

Dr. Byarugaba ng'akwasa omu ku baabadde mu musomo satifikeeti.

Dr. Baterena abadde aggalawo omusomo gw'abasawo abajjanjaba endwadde ezikwata mu lubuto ogubadde ku ddwaaliro ekkulu e Mulago okumala wiiki nnamba. Pulezidenti w'ekibiina ekigatta abasawo bano Dr. Vivian Akello ategeezezza nti mu musomo guno mwe baategekedde olusiisira lw'ebyobulamu okujjanjaba abamu ku balina endwadde zino kyokka abalwadde babadde bangi nga tebasobola kubamalawo mu wiiki emu abalala ne babajuliza ku nnaku endala.

Ategeezezza nti olunaku olwasooka lwokka baafuna abalwadde 450 nga ne bwe bakola kw'abo bonna tebasobola kubamalawo. Dr. Peter Mbidde agambye nti abalwadde be baakozeeko waliwo abamu ababadde balina ebizimba by'omu lubuto, abamu babazuddemu kkansa ng'atandika ne babalongoosa ne bamuggyamu.

Dr. Akello agambye nti okusinziira ku kye bazudde, enteekateeka efaananako bweti baakwongera okugitambuza ebitundu by'eggwanga eby'enjawulo kubanga abantu bangi abalina endwadde bwe zityo kyokka abakugu abazijjanjaba batono n'ebifo ebirina empeereza bwetyo mu ggwanga.