Omusajja akubye abaana 2 akakumbi n'abatta e Isingiro

OMUSAJJA akutte akakumbi ku kyalo n’alumba amaka 4 n’ava nju ku nju ng’agenda akuba abaamu ku mutwe era n’atta abaana babiri abantu abalala ne basigala n’ebisago nga bataawa.

 Bya DAMBA WIZIRI

OMUSAJJA akutte akakumbi ku kyalo n’alumba amaka 4 n’ava nju ku nju ng’agenda akuba abaamu ku mutwe era n’atta abaana babiri abantu abalala ne basigala n’ebisago nga bataawa.

Olwamaze okutta abaana yabadde akyalumba amaka amalala okubakuba abatuuze ne bakung’aana ne bamukuba naye ne bamutta ne baamuziika kiro.

Baliraanwa be baategeezezza nti yasoose kutabuka mu kiro ku Lwomukaaga n’atandika okulaya enduulu kyokka n’akkakkana.

Ssande lwakedde nga bulijjo kyokka zaabadde ziwera ssaawa 10:00 olweggulo abatuzze ne babategeeza ekyabagudde Nicholas Kyakabaale n’akwata akasimo n’alumba nju ku nju ng’agenda akuba abantu okukkakkana ng’asse abaana Ronia Atuhwereire 2 muwala wa Edison Tulyamuleeba ne Sharon Akakwasa muwala wa Pouson Nsiimire.

Olwavudde eyo yalumbye nnamukadde Winnie Busherekyire, 77, ne Breach Atukorera, 4, be yakubye naye ne basimattuka.

Kyakabaale abadde mupakasi ku kyalo Ruhiira ggombolola ya Nyakitunda e Isingiro.

NAMUKADDE BUSHEREKYIRE EYASIMATTUSE ALOJJA:

Nabadde nsitudde sseffuliya ya mmere era nagenze okulaba ng’omusajja ajja gyendi ng’andezeemu enkumbi ne nkuba enduulu okuyambibwa.

Newankubadde nakubye enduulu, Kyakabaale yannumbye bulumbi. Mu kwerwanako nnataddeyo sseffuliya y’emmere era eno gye yakubye n’atankwasa mutwe nga bweyabadde ayagala.

Kigambibwa nti Kyakabaale abadde atera okupakasa mu maka g’abazadde b’abaana be yasse.

Kigambibwa mu kazigo mw’asula bwe mwayaziddwa mwasangiddwamu ekiveera ky’enjaga.

Omusajja akubye abaana 2 akakumbi n’abatta e Isingiro