Nadduli ayagala Kitatta alekulire ekifo kya NRM

By Musasi wa Bukedde

Abakulembeze ba NRM baagala ssentebe wa NRM e Lubaga, Abdallah Kitatta alekulire ekifo kye kuba eneeyisa ye teweesa kibiina kitiibwa.

Kitatta 350x210

Hajji Abdu Nadduli, minisita atalina mulimu gwa nkalakkalira era ssentebe wa NRM mu Buganda yagambye nti okusinziira ku bintu eby’ogerwa ku Kitatta kiba kikyamu okugenda mu maaso okukulembera abantu.

Yagambye nti eby’ogerwa ku Kitatta ne bwe bitabeera bituufu alina okusooka okudda ku bbali n’anoonyerezebwako.

Yannenyezza n’abakulira ebyokwerinda olw’okukkiriza abantu abakyamu aba Bodaboda 2010 okujoonyeza Bannayuganda nga balaba.

Richard Todwong, amyuka ssaabawandiisi wa NRM mu ggwanga yagambye nti ng’ekibiina kitunuulidde ne liiso ejjogi emisango egyaggulwa ku Kitatta.

Yategeezezza nti ne bw'anabeera emisango agiwangudde, balina okumuyita mu kakiiko ke mpisa ng’ekibiina, kuba w'alina okubeerawo ensonga lwaki gwe baalonze mu bantu bonna.

Kyokka yawabudde nga bwe watali muntu alina buyinza kuggyamu Kitatta bwesige, okuggyako ng’agoberedde emitendera emituufu egikkirizibwa mu kibiina.