Namuganza asekeredde ababaka be Busoga abaamugobye

By Kizito Musoke

MINISITA omubeezi owe by’ettaka, Persis Namuganza asekeredde ababaka ba Palamenti abava e Busoga abaamugobye mu kabondo ka ‘Busoga Parliamentary Caucus’ n’agamba nti baayagadde kumanyika mu bantu nti bulijjo gye bali.

Namuganza 350x210

Yagambye nti kyewuunyisa okuba ng’ababaka  b'e Busoga olukiiko lwe basoose okutuuza baatudde kumugoba wadde nga balina ebizibu bingi ebinyiga ekitundu kyabwe.

“ Busoga kimanyiddwa ng’ekitundu ekijuddemu envunza ezisibuka e Kamuli, ffe kitundu ekisinga okubeeramu obwavu, kyokka bino baabibuusizza amaaso obudde ne babumalira ku nze,” Namuganza bwe yagambye.

Eby’okumugoba yabiyise katemba kuba ye tabeerangako mmemba wa kibiina kyabwe kuba yakizuula nga tebalina mulamwa kwe batambulira.

Yaweze nga bwe watali muntu ayinza kumutangira kugenda Busoga n’agamba nti abaamugobye baayagadde kumanyisa nsi nti bulijjo waliyo kye bayita Busoga Parliamentary Caucus.

Namuganza okuvaayo kiddiridde ababaka abava e Busoga okulangirira ku Lwokutaano nga bwe baamugobye era ne bamulabula obutageza kulinnya kigere Busoga okuggyako ng'akozesezza nnyonyi erina okumutuusa e Bukono gy'akiikirira.