Bp. Ssekamaanya akuutidde ab’e Bungereza okubeera obumu

By Musasi wa Bukedde

OMUSUMBA Mathias Ssekamaanya ayimbye Mmisa e Bungereza n’akuutira Bannayuganda ababeerayo okunyweza obumu.

Laba 350x210

Ssekamaanya eyali omusumba w’e Lugazi nga kati yawummula, yakyalidde Bannayuganda abeegattira mu kibiina kya Uganda Croydon Catholic Community mu Bungereza gy’agenda okumala omwezi mulamba.

Yayaniziriddwa ssentebe w’ekibiina kino, Robert Mpiima Mugambe eyamwanjulidde entegeka ey’okukulaakulanya ekibiina kyabwe muno nga mulimu n’okuyamba ekigo ekipya ekya Kamira ekisangibwa mu ssaza ly’e Kasana Luweero.

Mpiima era yayogedde ne we batuuse ku kugula ekizimbe kyabwe e London mu Bungereza.

Oluvannyuma yakulembeddemu Mmisa ku klezia ya St. Chad Catholic Church esangibwa e South Norwood mu South London mu Bungereza n’akuutira Bannayuganda okwegatta, okukolaganira awamu n’obutasosola mu mawanga.