Lumumba ayogedde ekyawanguzizza NRM mu Arua

By Kizito Musoke

NRM ekkirizza bwe yawanguddwa mu kulonda kwa Arua Munisipaali gye baabadde bajjuza ekifo ekyalimu Col. Ibrahim Abiriga eyattibwa gye buvuddeko.

Lum2703422 350x210

Justine Kasule Lumumba, Ssaabawandiisi wa NRM yatuuzizza olukuhhaana lwa bannamawulire eggulo n’ategeeza nti bakkirizza nti Kasiano Wadiri yabawangudde, owa NRM, Nusura Tiperu yakutte kyakubiri.

Bwe yabuuziddwa oba nga mu kiseera kino batandise okweraliikirira amaanyi Bobi Wine g’azze nago naddala olw’engeri gy’abawangudde e Jinja, Bugiri ne Arua yagambye nti si kituufu.

Yagambye nti akakiiko k’ebyokulonda kaakategeka okulonda kwa Palamenti emirundi 32 okuva mu 2016, kyokka ekibiina kya NRM kisobodde okuwangula ebifo 21, UPC -1, DP-1, FDC-2, n’abatalina bibiina mukaaga.

Kasule yagambye nti mu mbeera eyo tebayinza kubeera na kutya kwonna nti NRM bagiri bubi kuba ewangudde ebitundu 66 ku buli 100.

Kyokka mu kulonda okuwerako NRM gye yawanguddwa yagambye nti muzze mwetabikamu ebikolwa by’okutabangula emirembe, n’agamba nti ebikolwa bino bitiisa abakazi okulonda ate nga be bawagizi ba NRM abatakyukakyuka.

Kasule yayozaayozezza aba NRM olw’okuwangula obukiiko bw’abakyala mu disititulikiti ezisinga mu Uganda.