UNRA gwe yamenyedde ennyumba e Kyebando akukkuluma olw’obutamusasula

By Henry Kasomoko Henry Kasomoko

ANNET Alupo 45, ow’e Kyebando Kisalosalo g’akaaba g’akomba oluvannyuma lw’ekitongole kya UNRA okumumenyera ennyumba ye mwabadde asula ne famire ye ng’agamba nti tebaamusasula.

Sasula 350x210

Alupo agamba nti aba UNRA baasooka kumuwa emitwalo 49 nga zaali zaakumuliyirira kaabuyonjo gye baali baamenya.

Yayogeddeko nti oluvannyuma nga bamaze okukola ekkubo baagenda mu maaso ne boonoona ennyumba ye ne baddamu ne bamusasula obukadde 18 ez’okugiddaabiriza.

Yawakanyizza bye bagamba nti baamusasula n’agamba nti ssente ze baamuwa zaali za kuddaabiriza ebyo bye baali boonoonye.

Ku Lwokusatu aba UNRA baagenze e Kyebando ne bamenya ennyumba ya Alupo era baasoose kulemesebwa olw’omuntu eyayingidde mu nnyumba n’agaaniramu wabula ne bamukkakkanya n’avaamu.

John Bosco Ssejjemba eyakulembeddemu omulimu gw’okumenya ennyumba eno okuva mu UNRA yategeezezza nga Alupo bwe yasasulwa edda obukadde 25 kyokka n’ategeeza nti oluvannyuma lwa UNRA okumala ebbanga nga tebannayisa luguudo mu kifo kino, yeekyusa nti tasasulwanga.

Yategeezezza nti ekitongole kirina empapula ezikakasa ensonga eno n’agamba nti kiyinzika okuba ng’ekyamuwubisa kwe kuzimuwanga mu bitundutundu.