Palamenti esiimye Kirumira: Ababaka batadde minisita ku nninga annyonnyole ku by'okumutemula

By Musasi wa Bukedde

ABABAKA ba Palamenti basiimye emirimu ASP Mohammed Kirumira gy’akoledde eggwanga ne batendereza n’obuvumu bw’abadde akozesa okulwanyisa abamenyi b’amateeka.

131736705311775037218421032422864993791094n 350x210

Palamenti eggulo ng’ekubirizibwa Sipiika Rebecca Kadaga yalaze okutya olw’embeera y’ebyokwerinda eri mu ggwanga ne basaba wabeewo ekikolebwa eky’amangu okumalawo ettemu erisusse.

Omubaka Theodore Ssekikubo yagambye nti eggwanga liri ku bunkenke kubanga omunene n’omutono bonna battibwa.

Ababaka okuli Joseph Ssewungu ne Florence Namayanja baatenderezza obuvumu bwa Kirumira naye ne bakolokota Gavumenti obutakola kimala kumalawo butemu omuli obw’emmundu, obw’ebijambiya, obutayimbwa n’obumenyi bw’amateeka obulala.

Ababaka baatadde Minisita omubeezi ow’ensonga z’omunda Obiga Kania ku nninga annyonnyole ku by’okutemula Kirumira kubanga azze alaga okutya nti baagala kumutta naye n’atayambibwa.

Kania yasuubizza okutegeeza Palamenti ebinaaba bituukiddwaako ku nsonga z’abaatemudde Kirumira mu nnaku bbiri.