Ebya S6 bifuluma leero

By Ahmed Mukiibi

EBYAVA mu bigezo bya Siniya eyoomukaaga ebifulimizibwa olwaleero biraga ng’abayizi baabikoze bulungiko.

Odonguace 350x210

Minisita omubeezi ow’amatendekero aga waggulu, Dr. J C Muyingo y’agenda okufulumya ebyava mu bigezo ku lwa Minisita w’Ebyenjigiriza, Muky. Janet Kataha Museveni ali ebweru w’eggwanga ku mirimu emitongole.

Dr. Muyingo yategeezezza nti agenda kufulumya ebyava mu bigezo ku ssaawa 5:00 ez’oku makya n’oluvannyuma abakulira amasomero bakwasibwe eby’amasomero gaabwe ku kitebe kya UNEB e Ntinda Abayizi 99,672 be baatudde ebigezo bino ebya Uganda Advanced Certificate of Education (UACE) mu masomero 2,217 wakati wa November 12 ne December 4, 2018.

Omuwendo gw’abayizi abaatudde ebya S6 omwaka 2018 gwabadde wansi bw'ogeraageranya ku bayizi 102,007 abaatuula ebya UACE mu 2017, ekitegeeza nti omuwendo gw’abatudde ebya S6 mu 2018 gwakendedde abayizi 2,335 bw'ogeraageranya n’abaabituula mu 2017 Ku bayizi 99,672 abaatudde ebya S6 mu 2018, kuliko abalenzi 58,359 ate abasigadde 41,313 bawala.

Ku bayizi abo 18,550 (abalenzi 12,577 n’abawala 5,973) ababadde baweererwa Gavumenti ku bwereere ate abasigadde 81,122 (abalenzi 45,782 n’abawala 35,340) babadde basomera mu masomero ag’obwannannyini.