Ab’e Kawempe balaajanidde KCCA ku nguudo

By Musasi wa Bukedde

ABATUUZE b’e Kawempe basabye ekitongole kya KCCA okukola ku nguudo ezirimu ebinnya ze bagamba nti zifuuse mpuku z’ababbi mwe bateegera abantu.

Kola1 350x210

Baagambye nti bateega abantu n’ebidduka mu nguudo ez’ebinnya okuva ku ssaawa 1:00 ey’akawungeezi nga n’abamu bakozesa boodabooda okudduka nga bamaze okubba.

Ezimu ku nguudo ababbi ze baafuula empuku kuliko Musooka Road e Kanyanya, ekkubo eriva ku nkulungo y’e Mulago okuyita mu Katanga, Ssendawula Road erisangibwa mu Kawempe I mu zzooni y’e Kirokole zzooni n’endala.

 

Omu ku batuuze, Julius Ssentume ow’e Kanyanya yategeezezza nti ssinga Gavumenti tesitukiramu kulwanyisa bamenyi b’amateeka, bandifuuka ekizibu mu ggwanga .

Janet Nakayenga ow’e Nammere yagambye nti yabadde ava ku mulimu ssaawa 3:00 ez’ekiro n’asanga abavubuka 4 nga batambula omu n’akuba mmotoka ye ekibaawo ate omulala n’amusikako essimu n’akasawo ne badduka.

 

Mmeeya w’e Kawempe, Emmanuel Sserunjogi yasabye abatuuze okubeera abakakkamu n’agamba nti, enguudo zigenda kukolebwa mu mwaka gw’ebyensimbi ogujja kyokka poliisi yo yalumirizza abatuuze okukolaganira wamu n’ababbi.