Liverpool FC ekoze likodi endala! Yeekudde omusimbi n’egula ‘ekyasi

By Musasi wa Bukedde

KYADDAAKI, Liverpool yandiba ng’ekizibu kya ggoolokipa ekitutte ebbanga nga kigisumbuwa ekisalidde amagezi.

Alissonbecker990069 350x210

Eggulo, abakungu ba Liverpool bakkiriziganyizza ne kiraabu ya Roma okusonjola Omubrazil Alisson Becker ku bukadde bwa pawundi 67.

Okusinziira ku ndagaano eyakoleddwa wakati wa Liverpool ne Roma, Liverpool yaakusooka kusasula obukadde bwa pawundi 53 n’ekitundu oluvannyuma esasule obulala 9 obubulayo.

Ddiiru eno kati efudde Alisson Becker (25), omukwasi wa ggoolo akyasinze okugulwa ssente ennyingi nga yamenyewo Gianluigi Buffon.

Obutabeera na ggoolokipa mulungi, kyalemesa Liverpool okuwangula Champions League sizoni ewedde, Real Madrid bwe yabakuba ggoolo 3-1. Ggoolo bbiri eya Karim Benzema n’eya Gareth Bale zaava mu nsobi za Loris Karius.

Karius, 25, y’abadde nnamba emu wa Liverpool wabula ensobi ze yakola ku fayinolo ya Champions League, zaaleetera bangi ku bawagizi ba Liverpool okumuggyamu obwesige ekyatadde omutendesi Jurgen Klopp ku puleesa y’okufuna ggoolokipa ali ku ddaala ly’ensi yonna.

Alisson, ye muzannyi owookubiri Liverpool gw’eggye mu Roma mu bbanga lya myezi 13.

Yasooka kugulayo Mohammed Salah mu June wa 2017.