Paul Scholes obutendesi bumwokezza n'asuulawo ttiimu

By Musasi wa Bukedde

Scholes y'omu ku baali abawawuwuttanyi ba ManU aba kabi ne bawangulira ttiimu eyo ebikopo bingi.

Scholes 350x210

EYALI omuwuwuttanyi wa ManU, Paul Scholes asuddewo omulimu gw’okutendeka Oldham eya League Two e Bungereza ng’agamba nti takyasobola kugiddukanya mu ngeri gye yandyagadde eddukanyizibwe.

Scholes, muwagizi wa Oldham okuva obuto era okutwala omulimu guno gw’amazeeko wiiki ennya (omwezi gumu) abadde n’essuubi nti anaawa abawagizi essanyu naye ly’awulira ku mutima naye bigaanyi.

Omutindo gwa ttiimu eno guddiridde nnyo nga Scholes ye mutendesi waayo kuba mu mipiira mukaaga gye basembye okuzannya, tebawanguddeeko na gumu.

Scholes, abadde amanyiddwa ennyo mu kusojja abatendesi ba ManU ku luwonzi buli ttiimu lw’ekola obubi, yeetondedde abawagizi, abakungu n’abazannyi ba ttiimu olw’okubayiwa n’atatuukiriza buvunaanyizibwa bwe.

Wabula waliwo abawagizi abagambye nti Scholes k’akirabe kuba yasojja nnyo Mourinho we yabeerera mu ManU era Scholes y’omu ku baamugobya.