Obulimi bwa leero bwetaaga magezi na ssente - Mubaka

By Alice Namutebi

OLUVANNYUMA lw’abavubuka n’abakyala 40, okubangulwa ne baweebwa amabaluwa ku ffaamu ya Dr. Diana Nambatya Nsubuga, omu ku bawanguzi b’empaka z’omulimi asinga eya Kwagala Farm e Kulambiro, abalimi n’abalunzi okuva e Buligwe- Luweero nabo baagenze ewa Dr. Nambatya okubangulwa.

Mubaka1 350x210

Bya ALICE NAMUTEBI ne HERBERT MUSOKE

OLUVANNYUMA lw’abavubuka n’abakyala 40, okubangulwa ne baweebwa amabaluwa ku ffaamu ya Dr. Diana Nambatya Nsubuga, omu ku bawanguzi b’empaka z’omulimi asinga eya Kwagala Farm e Kulambiro, abalimi n’abalunzi okuva e Buligwe- Luweero nabo baagenze ewa Dr. Nambatya okubangulwa.

Ku ntandikwa y’omwezi guno, abavubuka n’abakyala 40, baaweebwa amabaluwa oluvannyuma lw’okubangulwa mu kulimira awafunda n’okwongera omutindo ku bye bakungudde.

Wano omubaka wa Budaaki mu Uganda Henk Jan Bakker we yasinziira n’abakubiriza obutatuulira bukugu bwe bafunye wabula nabo basomese abalala ababwetaaga.

Ono yagamba nti abalimi abalina obumanyi gye banaakoma okusomesa abalala ne Uganda gy’egenda okukoma okukulaakulana. “Uganda eyimiriddewo ku bulimi na bulunzi kyokka wadde ng’amawanga amalala nga Budaaki gakulaakulanye lwa bulimi na bulunzi, Uganda ekyalemereddwa okukula olw’abalimi obutabeera na bukugu okulima n’okulunda mu ngeri y’enjawulo.

Noolwekyo abalina obukugu buno, okusomesa abalala kikulu nnyo era ky’akuyamba okuzimba eggwanga,” bwe yagambye.

Dr. Nambatya ng’ayambikwako ekitongole kya SKY/AVSI ekikolagana n’ekitebe kya Budaaki wamu ne bbanka y’ensi yonna yabangudde abavubuka okuva e Makerere, Kiboga ne Kulambiro mu kulimira awafunda, okugatta omutindo ku bye bakola n’ebirala n’abakubiriza okussa mu nkola ebibasomeseddwa n’okwetaba mu mpaka z’omulimi asinga okufuna ku birabo n’emigaso entoko ebizirimu omuli ssente n’okugenda e Budaaki okuyigira ku balimi n’abalunzi abakugu.

Mu bimu ku bye baabanguddwwaamu mwe muli okukola ekigimusa kya nnakavundira okuva mu busa bw’ente Dr. Nambatya z’alundira ku ffaamu ye eri ku kitundu kya yiika ky’agamba nti omuntu yenna alina ensolo asobola okukikola n’afunamu ssente kuba kati ye akyongeddeko omutindo ng’akitunda n’ebweru w’eggwanga.

Agamba nti okuganyulwa n’okufuna mu bulimi olina kusooka kubwagala n’okwebuuza ku bakusingako engeri gye bakikolamu kubanga buli muntu abeera ne ky’akusingako ne bwe kiba kitono wano osobole okubaako ky’okola mu ngeri ey’enjawulo.