Bobby asuubizza obuwanguzi e Namboole

BOBBY awadde Bannayuganda essuubi bw'ategeezezza nga Cranes bw’esobola okufuna obuwanguziku Zambia okugenda mu mpaka za Afrika.

Bya FRED KAWEESI

Zambia 1-0 Uganda

October 13 e Namboole:

Uganda - Zambia

BOBBY Williamson, omutendesi wa Cranes, yawadde Bannayuganda essuubi bwe yategeezezza nga Cranes bw’esobola okufuna obuwanguzi ne bugiyamba okugenda mu mpaka za Afrika.

“Tekigenda kutubeerera kyangu e Namboole naye ttiimu yange erina obusobozi okuyitawo kubanga tugenda kulumba bulungi ate nga eno bwe tuzibira,” Bobby bwe yategeezezza ng’omupiira guwedde.

Bobby yayanguye okwongerako n’ebyafaayo bya Cranes e Namboole nga bwe biri ebirungi.

“Tulina likodi ennungi awaka kyokka sigenda kukkiriza bazannyi bange kulowooza nti ebintu bigenda kuba byangu,” bwe yagasseeko.

Bobby agamba nti wadde nga teyafunye ggoolo ya ku  bugenyi gye yabadde asinga okwagala, musanyufu n’ekyo ekyavudde mu mupiira guno.

Cranes yeetaaga kuwangula ne ggoolo 2-0 bw’eba yaakuyitamu okugenda mu South Afrika okwetaba mu kikopo kya Afrika omwaka ogujja. Zambia ye kyampiyoni wa Afrika.

Bobby asuubizza obuwanguzi e Namboole