Abalima ebikozesebwa mu kusogola omwenge basabye ebbaala ziggulwe

Sosimu Twesiga

ABALIMA ebikozesebwa mu kusogola omwenge balaajanidde gavumenti ne bagisaba okuddiriza ku mateeka g'omuggalo ku bbaala. Bano mulimu abalima; omuwemba, muwogo, kasooli n'ebirala ebikozesebwa mu kusogola omwenge.

Abalimi bano okuva mu bitundu by'eggwanga eby'enjawulo, nga bakulembeddwa Sosimu Twesiga, baasinzidde mu lukungaana lwa bannamawulire e Lugogo.

Baalaajanidde Gavumenti okukkiriza ebbaala okuddamu okukola nabo basobole okufuna akatale k'ebirime byabwe nga bagamba kkampuni ezisogola omwenge tezikyalina busobozi kubagulako birime byabwe olw'ensonga nti omwenge gutambula kitono olw'omuggalo.

Bategeezezza nti okuva mu March bafiiriddwa ssente eziri mu buwumbi era batuuse n'okutunda ebirime byabwe ku ddondolo okwewala okufiirwa ssente zonna.

Twesiga yayongeddeko nti abalimi abamu bawaliriziddwa n'okugoba abamu ku bakozi baabwe be babadde bakozesa ku ffaamu zaabwe nga bagamba tebakyalina nsimbi za kubasasula ate n'amabanja gabali mu bulago. Bagamba ebintu byabwe bituuse okutwalibwa bbanka ezaabawola ssente.

Abalimi bano basabye Gavumenti okuggula ebbaala kiyambe kkampuni ezikola omwenge okuddamu okukola obulungi.