Sheikh Muzaata talina Corona - basawo

Sheikh Muzaata

ABASAWO boogedde ku mbeera ya Sheikh Nuhu Muzaata. Akyajjanjabirwa mu
kisenge ky'abayi olwa ssukkaali ayongedde okulinnya.  Kyokka ebyavudde mu kumukebera biraga nga talina corona.

Sowed Sulaiman Muwonge, mutabani wa Muzaata amulabirira mu ddwaaliro lya IHK
e Namuwonge yagambye nti abasawo baabawadde ebyavudde mu kukebera Muzaata
ku Lwokuna olweggulo.

"Allah asaasidde Sheikh Muzaata ebyavudde mu kumukebera bikomyewo nga talina corona", bwe yagambye.

Kyokka n'agattako nti abasawo baategeezezza ffamire nti bakyamukuumira mu kifo
ky'abayi kubanga ssukkaali we ali waggulu. Puleesa nayo eri waggulu.

Okulinnya kwa ssukaali abasawo baakitadde mu kubeera ng'abadde n'ebirowoozo bingi
n'obutawummula okumala ebbanga.

Muzaata yaweebwa ekitanda ku Ssande ewedde. Kyasooka kulowoozebwa nti alumizibwa musujja kyokka ne kizuulwa nga ssukkaali ne puleesa birinnye.

Ekirala ng'alina obubonero bwa corona kyokka bwe yakebeddwa kigambibwa nti
kyazuuse nga tamulina.

Dr. John Katamba ow'e Mulago yagambye nti ssukaali okulinnya kiva ku bintu ebiwerako okuli okuba n'ebirowoozo ebingi, okulwala, obutakola dduyiro, obutamira
ddagala ttuufu mu kiseera ekituufu n'okulya ennyo emmere eteriimu kirungo kya ssukaali (hypoglycaemia).