Ttiimu y''abato eri mu za mpaka za Afrika ez'omupiira.

Ivan Boogere

Mu Afrika U20
Uganda 3-1 Kenya

GGOOLO za Ivan Bogere (2) ne Kenneth Semakula zaayambye The Hippos okwesogga empaka za Afrika ez'abali wansi w'emyaka 20. Empaka zino zaakubeera Mauritania omwaka ogujja.

Baakubye Kenya ggoolo 3-1 eggulo, mu mupiira ogwazannyiddwa ku Black Rhino Academy Sports Stadium, mu disitulikiti y'e Karatu e Tanzania.
Okutuuka ku fayinolo, kitegeeza nti Uganda egenze butereevu mu za Afrika, ng'erimu ku mawanga abiri (2) okuva mu kitundu kya CECAFA.

Kati The Hippos erwanira kikopo kya CECAFA, ekomewo n'obuwanguzi obujjuvu.
Morley Byekwaso, atendeka ttiimu eno, yagambye nti wadde baayiseewo, ekigendererwa kyabwe kya kuwangula kikopo era bakyalwana okutuusa nga bakituukirizza.
"Tulina okudda mu Uganda n'ekikopo kuba buli mupiira gwe tuzannya omutindo gw'abazannyi gweyongera okulinnya," Byekwaso bwe yategeezezza.

Uganda yaakuttunka ne South Sudan oba Tanzania abaazannye oluvannyuma, ku fayinolo ezannyibwa enkya ku Lwokusatu.

Okutuuka ku semi Uganda yakulembedde ekibinja ku bubonero 4, nga yakubye Burundi (6-1) n'okugwa amaliri (0-0) ne South Sudan.