Bweguba muti omuvule gugudde -Gen. Katumba Wamala bw'ayogedde ku Muzaata

Gen. Katumba Wamala ng'ayogera eri abakungubazi mu maka ga Muzaata.

Gen Katumba Wamala ategeezezza nti omugenzi abadde mukwano gwe nnyo ng'era bwe guba muti omuvule gwe gwagudde mu kibira.

Yagasseeko Muzaata abadde  avaamu ebigambo ebikaawa ng'omususa naye nga bizimba ng'era n'ebwoba obadde mukwano gwe n'okola ensobi ng'akugamba gwe osalawo oba ogitereeza oba omunyiigira kyokka ye abadde tasiba busungu

Yagasseeko nti wiiki bbiri n'ekitundu nga Muzaata tannalwala yamusisinkana  ng'alina ensonga zaamubuulira ezikwatagana n'ekifo kye  awali amaka ge. Yagambye nti okufa kwa Muzaata kuwe abantu ekyokuyiga nti balina okukomya okwewalana

"Lwaki mulimba Katonda nti mumwagala nnyo nga baliraanwa bammwe mu bawalana! Mbasaba mukomye empalana kuba tewali amaanyi lunaku lwaligenda,''  Katumba Wamala bwe yategeezezza

MUFTI NDIRANGWA

Ntuusa okusaasira kwange eri Obusiraamu  n'eggwanga lyonna olwokufiirwako omuntu abadde atambulira ku mazima , Muzaata ye musajja abadde  ateerya ntama nga Basheikh bonna mu ggwanga abalekedde ebbanja  nga balina okufuna okulaba nga batambulira kw'ebyo by'azze ababuulirira.

Mufuti Ndirangwa Ne Gen Katumba Wamala Ku (ddyo).

Bannamwandu Ba Muzaata, Kulthum (ku Kkono) Ne Aminah.

Omuyimbi Haji Haruna Mubiru Naye Yabaddeyo.

Meeya W'e Lubaga Nabbosa Ssebuggwawo

Abakungubazi Nga Balya Ku Muceere

Abamu Ku Bakungubazi Mu Lumbe Lwa Muzaata.

Ono Ng'akavvula Ekifi Ky'ennyama Mu Lumbe.




NABBIRA SSEMPALA

Nabbira Ssempala avuganya ku kifo ky'obwaloodi meeya wa Kampala:Sheikh Muzaata muyigiddeko ebintu bingi. Nze buli lwe mbadde nfuna ekinsumbuwa nga mukubira akasimu. Muzaata   ye muntu eyasooka n'okumanya nti ngenda kwesimbawo ku bwa loodi Meeya , amazima Muzaata abadde musajja nnyo mu buli nsonga .

MADIINA NSEREKO

Madiina Nsereko Commissioner w'ebyettaka: Maama waffe yafa 2011 n'atulekera Muzaata ng'omukuza amazima w'afiiridde ng'omulimu gw'obukuza agukoze bulungi kuba abadde atukubira ku ssimu n'atubuuza nti baana bange muli bulungi kale tusaba Mukama ammuwuze mirembe.

EDRISA TENYWA

Edrisa Tenywa avuganya ku kifo ky'obw'obubaka bwa palamenti mu Kawempe South: Omugenzi kasita yazuula nti tweddira omuziro gumu abadde ampita mutoowe. Muzaata abadde tasosola mu bibiina byabufuzi, mu ddiini kuba n'Abalokole babadde mikwano gye, nsaba abantu tumuyigireko .

MULUMBA

Matthias Mulumba avuganya ku kifo ky'obubaka bwa palamenti mu Kawempe yagambye nti Muzaata ye musajja abadde tanyigirwa mu ttooke ng'emisana n'ekiro takyukakyuka mu bigambo  naye okufa kwe ffenna kutukubye wala.

Bweguba muti omuvule gugudde -Gen. Katumba Wamala bw'ayogedde ku Muzaata