Ab'e Jinja Kalooli batabukidde abakulembeze lwa butafuna butimba bwa nsiri

Ssentebe Andrew Kasatiiro ng'agezaako okunnyonnyola abaatafunye butimba.

Abatuuze b'e Jinja Kalooli mu Wakiso beeweereza ebisongovu n'abakulembeze baabwe lwa butabawa butimba bwa nsiri.

Kino kiddiridde abatuuze okweyiwa mu bungi awaabadde wagabirwa obutimba kyokka ssentebe n'akabatema nga bwe batagenda kufuna olw'ensonga nti tebawandiikiddwa ekibaggye mu mbeera.

Ssentebe Andrew Kasatiiro yakanze kubawoyaawoya nga butereere era bano basazeewo okutuula awabadde wagabirwa obutimba abamu ne balemera mu nnyiriri ze babadde basimbye ekyalwisizza abaabade balina okufuna obutimba.

Kasatiiro ategeezezza nti obuzibu buno bwavudde ku gavumenti etaabawadde budde bumala kuwandiika bantu ate era nga tebafunye na kumanyisibwa kumala ku nsonga y'okugaba obutimba, bangi batuuka okwewandiisa nga tebaliiwo bagenze dda ku mirimu gyabwe.

Ayongerako nti omuwendo gw'abantu abaabalibwa okuweebwa obutimba gwali munene okusinziira ku butimba obwamuweereddwa. 

Asabye gavumenti okwongezaayo ku lunaku z'okugaba obutimba era n'okubongera ku butimba abantu baabwe basobole bulyomu okufuna.