Uncle Money asibiddwa emyaka 4 lwa kutta muntu

Uncle money Jackson Ssewanyana ku kkono ne Benson Ssenyonga nga bali mu kaguli

Jackson Ssewanyana  amanyiddwa nga Uncle Money omuwagizi lukulwe ow'omupiira naddala Uganda Cranes ne ttiimu ya Express FC kkooti emuwadde ekibonerezo kyakusibwa emyaka 4 lwa kutta Akir Siraje Tumusiime mu butali bugenderevu.

Ettemu lino lyaliwo nga August 16, 2019 e Kasubi bwe baakwata Tumusiime ne bamusiba akandooya ne bamutwala mu musiri gwa lumonde ne bamukuba emiggo nga kwe bagasse n'okumusamba.

Omulamuzi wa kkooti ya Buganda Road Miriam Okello agambye nti Uncle Money nga omukulembeze w'ekyalo n'owebyokwerinda Benson Ssenyonga bwe bazza omusango baalina obuvunaanyizibwa bw'okukuuma amateeka n'okubeera ekyokulabirako ekirungi naye baasalawo kutwalira mateeka mu ngalo.

Omulamuzi agasseeko nti tewali muntu alina buyinza kuggyawo bulamu bwa munne n'abasaba bakozese ekibonerezo ky'emyaka ena okwefumintiriza n'okukyusa ebikolwa byabwe.