Omulwadde wa siriimu asobola okuzaala?

NDI mukyala ayagala waakiri okuzaalayo omwana omu kubanga nnina siriimu. Naye ssenga, kandida annuma naye neebuuza nti kandida taaleete obuzibu mu kuzaala?

Kandida tagaana mukyala kuzaala oba taleeta bugumba mu bakyala. Kandida si bulwadde bwa kikaba ng'abasinga bwe balowooza kuba omufuna ssinga wabaawo enkyukakyuka mu mubiri.

Kati balwadde ba siriimu bafuna kandida kubanga ekiziyiza ku ndwadde balina kitono kati olwo akawuka akali mu kika kya ‘fungus' nga kasangibwa mu bukyala keeyongera okukula ne kabeera kangi olwo omukyala n'afuna kandida.

Kandida ono asigala mu bukyala tayambuka mu nnabaana. N'ekirala mpozzi ekisobola okugaana okuzaala ke kawuka ka siriimu kennyini. Oluusi kalina bwe kataataaganya embeera z'okuzaala mu nnabaana.

Naye ng'omukyala yenna alina akawuka asobola okuzaala. Ekirala olina okulaba ng'omwana azaalibwa nga talina kawuka nga okozesa PMCTC. Mu malwaliro gonna enkola eno bagimanyi era bagikozesa.